काठमाडौं- भारतीय टेलिभिजन जी-न्युजका सम्पादक सुधीर चौधरीले सर्वोच्च शिखर सगरमाथाको नाममा भारतले दाबी गर्नुपर्ने बताएका छन्।
भारतीय टेलिभिजन जी न्युजको कार्यक्रममा उनले सगरमाथाको पहिलो पटक उचाइ नाप्ने व्यक्ति भारतका राधानाथ सिकदर भएकाले उनकै नामबाट सगरमाथाको नामाकरण हुनुपर्ने सामग्री प्रसारण गरेका हुन्।
प्रधानमन्त्री केपी शर्मा ओलीको अन्तर्वार्ता लिएको भोलिपल्टै भारतीय चौधरीले सगरमाथालाई आफूहरूले माउन्ट सिकदर भन्नुपर्ने उल्लेख गरेका छन्। हेलिकोप्टरमार्फत् सगरमाथाको बेसक्याम्पमा पुगेपछि उनले भनेका छन्, ‘सन् १८५२ मा माउन्ट एभरेस्टको उचाइ नाप्ने पहिलो भारतीय व्यक्ति राधानाथ सिकदर थिए। सर्भे अफ इन्डिया डिपार्टमेन्टले सिकदरलाई त्यो काम दिएको थियो।’
अंग्रेजहरूले सगरमाथासँग सम्बन्धै नभएको व्यक्तिको नामबाट यसलाई ‘माउन्ट एभरेस्ट’ राखेकाले अब सगरमाथाको नाम माउन्ट सिकदर राख्नुपर्ने उनको धारणा छ।
सगरमाथालाई माउन्ट सिकदर बनाउनका लागि भारतमा अभियान चलाउनुपर्ने भन्दै चौधरीले आफूले सगरमाथाको बेस क्याम्प पुगेर सुरूवात भएको बताएका छन्।
यसअघि पनि नेपालबारे विवासदस्पद सामग्री प्रशारण गर्दै आएको जी टिभी र त्यसका सम्पादक सगरमाथाको नाम परिवर्तन गर्नुपर्ने धारणा राखेपछि पुन विवादमा आएका छन्। तर नेपालका प्रधानमन्त्रीले अन्तर्वार्ता दिन विवादित पृष्ठभूमिको जी-न्युज र सुधीर चौधरीलाई रोज्नु गलत भएको टिप्पणी भइरहेको छ।
६ महिनाअघि जी-न्युजले प्रधानमन्त्री ओलीबारे कपोलकल्पित सामग्री प्रसारण गरेपछि नेपालका टेलिभिजन प्रसारकहरूले भारतीय न्युज च्यानल प्रसारण गर्न रोक लगाएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
