काठमाडौं- आन्तरिक राजस्व विभागका महानिर्देशक विनोदबहादुर कुँवरको सरुवा भएसँगै नयाँ महानिर्देशकको खोजी सुरु भएको छ। कुँवरको सामाजिक विकास मन्त्रालय गण्डकी प्रदेशमा सरुवा भएको छ भने त्यहाँका रामप्रसाद घिमिरेलाई अर्थ मन्त्रालय ल्याइएको छ।
अर्थ मन्त्रालयको सहसचिव हुँदा नै घिमिरेको प्रदेश २ मा सरुवा भएको थियो। त्यहाँबाट उनी गण्डकी प्रदेश पुगेका थिए। अर्थ मन्त्रालयको आर्थिक नीति विश्लेषण महाशाखा प्रमुख रहेका उनी वरिष्ठताका आधारमा प्रदेश पुगेका हुन्। श्रम, रोजगार तथा सामान्य प्रशासन मन्त्रालयबाट अर्थ आउँदा उनको दाबी अन्तर्राष्ट्रिय आर्थिक सहायता समन्वय महाशाखामा थियो। यद्यपि, उनले त्यो जिम्मेवारी पाएनन्।
कुँवर पोखरा जाने भएपछि आन्तरिक राजस्वको नेतृत्व गर्ने अधिकारीको खोजी अर्थ मन्त्रालयभित्र सुरु भएको छ। आफूमातहत ५ जना सहसचिव रहने भएकाले यो विभागको नेतृत्वका लागि वरिष्ठतम सहसचिवमध्ये कसैलाई पठाउने तयारीमा अर्थमन्त्री विष्णुप्रसाद पौडेल छन्।
अर्थ मन्त्रालयले विभागको नेतृत्वका लागि सहसचिव रामेश्वर दंगाल, चन्द्रकला पौडेल र दीर्घराज मैनालीमध्ये एकलाई अघि सार्ने तयारी गरेको छ। दंगाल मन्त्रालयकै राजस्व व्यवस्थापन महाशाखा प्रमुख हुन्। उनी यसअघि भन्सार विभागको महानिर्देशक भएका थिए। त्यसपछि आर्थिक मामिला तथा योजना मन्त्रालय गण्डकी प्रदेश गएका उनी त्यहाँबाट अर्थ मन्त्रालय आएका हुन्।
दंगाल सहसचिव वरियतामा अहिले १५ जनाभित्र छन्। सचिव बढुवाका लागि योग्यता पुगेकामध्ये पनि उनी १२ जनाभित्र छन्। अबको एक वर्षभन्दा कम समयमा उनको बढुवा हुने भएकाले विभाग जान ईच्छा देखाएका छैनन्।
विभागको महानिर्देशकको दावेदार हुन् सहसचिव पौडेल। राजस्वकै क्याडर उनी आन्तरिक राजस्व विभागको उपमहानिर्देशक तथा निमित्त महानिर्देशक भइसकेकी छन्। सार्वजनिक वित्त व्यवस्थापन तालिम केन्द्रको प्रमुखसमेत भएकी उनी अहिले आर्थिक मामिला तथा योजना मन्त्रालय गण्डकी प्रदेशमा कार्यरत छिन्। पौडेल महानिर्देशक भए विभागको इतिहासमा पहिलो महिला महानिर्देशक हुनेछिन्।
विभागको नेतृत्वका अर्का दावेदार हुन् मैनाली। राजस्व अनुसन्धान विभागको महानिर्देशक रहेका उनी दंगाल र पौडेलभन्दा जुनियर हुन्। दंगाल र पौडेलमध्ये एकजनालाई विभागको नेतृत्व दिँदा हालको संरचनामा परिवर्तन गर्नुपर्दैन।
मैनालीलाई हरिहरभवनबाट लाजिम्पाट लैजाँदा त्यहाँका उपमहानिर्देशक गजेन्द्रकुमार ठाकुरको पनि सरुवा गर्नुपर्ने हुन्छ। ठाकुर मैनालीभन्दा सिनियर हुन्। मैनाली राजस्वकै क्याडर हुन्। उनी नयाँ बानेश्वरसहितका केही कर कार्यालयका प्रमुख भइसकेका छन् भने ठूला करदाता कार्यालयको उपसचिव हुँदा उनको बढुवा भएको थियो।
उनीहरू तीनजनाबाहेक सहसचिव धनिराम शर्माको नाम पनि चर्चामा आउने गरेको छ। शर्मा मन्त्रालयको बजेट तथा कार्यक्रम महाशाखा प्रमुख हुन्। उनी कम्तिमा पनि अबको बजेटसम्म त्यहीँ बस्ने मनस्थितिमा छन्। अर्का सहसचिव झक्कप्रसाद आचार्यकाे नाम पनि चर्चामा रहे पनि उनले त्यसलाई अस्वीकार गर्ने गरेका छन्।
अर्थमन्त्री पौडेल तथा अर्थसचिव शिशिरकुमार ढुङ्गाना र राजस्व सचिव रामशरण पुडासैनी राजस्व समूहलाई आफ्नो 'ग्रिप'मा चलाउन सक्ने नेतृत्वको खोजीमा छन्। त्यसका लागि उनीहरूले कर प्रशासन बुझेको, बलियो नेतृत्व क्षमता भएको र इमानदार नेतृत्वको खोजी गरिरहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791645793.png)
-1786602170.png)
