काठमाडौं– पाकिस्तानसँगको दुई खेलको टेस्ट क्रिकेट सिरिज घरेलु टिम न्युजिल्यान्डले क्लिन स्विप गरेको छ। बुधबार भएको अन्तिम तथा दोस्रो खेलमा पाकिस्तानलाई एकै इनिङमा १७६ रनको जित निकाल्दै न्युजिल्यान्डले २–० ले सिरिज जितेको हो।
टस हारेर पहिले ब्याटिङ गरेको पाकिस्तानले पहिलो इनिङमा सबै विकेटको क्षतिमा २९७ रन बनाएको थियो। पाकिस्तानका अजहर अलीले ९३, कप्तान मोहम्मद रिजवानले ६१ र फाहिम अश्राफले ४८ रन बनाएका थिए। बलिङतर्फ न्युजिल्यान्डका कायल ज्यामिसनले ५ विकेट लिए। त्यसपछि ब्याटिङ गर्न आएको न्युजिल्यान्डले ६ विकेटको क्षतिमा ६५९ रन बनाएपछि पहिलो इनिङको घोषणा गरेको थियो।
पाकिस्तानविरुद्ध न्युजिल्यान्डले उच्च रन बनाउने क्रममा कप्तान केनले दोहोरो शतक बनाए। ३६४ बलको सामना गरेका केनले २८ चौका प्रहार गर्दै २३८ रन बनाए। कप्तान केनले दोहोरो शतक बनाउँदा हेनरी निकोलसले शतकसहित १५७ र डेरिल मिचेलले शतकसहित अविजित १०२ रन जोडे।
केन विलियम्सनको यो चौथो दोहोरो शतक हो। यसअघि सन् २०१५ मा श्रीलंकाविरुद्ध केनले २४२ रन बनाउँदै दोहोरो शतक बनाएका थिए। त्यस्तै, २०१९ मा बंगलादेशविरुद्ध २०० रन बनाउँदै अर्को दोहोरो शतक बनाएका थिए। यसै वर्षको डिसेम्बर ३ तारिखमा वेष्ट इन्डिजविरुद्ध २५१ रन बनाउँदै आफ्नो टेस्ट क्रिकेट करियरमै सर्वाधिक उच्च रन बनाएका थिए।
पहिलो इनिङको समाप्ति मै पाकिस्तान ३६२ रनको फराकिलो अन्तरले पछि परेको थियो। दबाबमा खेलेको पाकिस्तानले आफ्नो दोस्रो इनिङमा सबै विकेटको क्षतिमा १८६ रन मात्रै बनाएपछि न्युजिल्यान्डले एकै इनिङमा फराकिलो अन्तरले पराजित गरेको हो। पाकिस्तानका कुनै पनि ब्याट्सम्यानले दोस्रो इनिङमा उच्च रन बनाउन सकेनन्। अजहर अली र जाफर गोहारले समान ३७–३७ रन बनाएपनि अन्य ब्याट्सम्यान सस्तैमा पेविलियन फर्किए।
यसअघि पहिलो खेलमा न्युजिल्यान्डले पाकिस्तानलाई १०१ रनले पराजित गरेको थियो। टेस्ट सिरिजभन्दा अघि पाकिस्तानले न्युजिल्यान्डसँग ३ खेलको टि–२० क्रिकेट सिरिज खेलेको थियो। जसमा पाकिस्तानले न्युजिल्यान्डलाई २–१ ले सिरिज सुम्पेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1766648928.png)
