काठमाडौं- दुईसाता अघिदेखि मूल सुरुङ खन्न थालिएको नागढुंगा नौबिसे सुरुङ निर्माणमा स्थानीले अवरोध गर्ने संकेत देखिएको छ।
चन्द्रागिरी नगरपालिका- २ का स्थानीयले सुरुङ माथिको जमिनको क्षतिपूर्ति पाउनु पर्ने, खानेपानीको सुनिश्चितता हुनुपर्ने, सिंचाइ भइरहेको पानी व्यवस्थापन हुनुपर्नेलगायत माग राखेर आइतबार ज्ञापनपत्र बुझाएका हुन्।
आयोजनाको परामर्शदातालाई आइतबार दुई दिने अल्टिमेटम दिँदै स्थानीयले ज्ञापनपत्र बुझाएको आयोजनाले जनाएको छ।
स्थानीयले विभिन्न पाँच बुँदामा माग राख्दै चन्द्रागिरि नगरपालिका वडा नम्बर २ का अध्यक्ष गोपी सुर्खेतीको नेतृत्वमा उक्त चेतावनी दिइएको हो।
आयोजनाले निर्माणको काममा भएको क्षतिको तत्काल पुनर्निर्माण गर्नुपर्ने, खानेपानी निःशुल्क उपभोग गर्दै आएकोमा आयोजना निर्माणपश्चात् पनि निःशुल्क हुनुपर्ने माग स्थानीयहरूले राखेका छन्। त्यस्तै उनीहरूले आफूलाई रोजगारी दिनुपर्ने, विशेष प्रभावित क्षेत्र घोषणा गर्नुपर्ने र त्यस्तो क्षेत्रमा फुटबल मैदान बनाइदिनुपर्ने, सडक मार्ग निर्माण गरि कालोपत्रे गर्नुपर्ने माग अघि सारेका छन्।
आफूले राखेका यी माग पूरा नभए दुई दिनभित्र काम रोकिदिने चेतावनी दिएका छन्। स्थानीयले आइतबारदेखि नै खानेपानीका लागि भइरहेको काममा भने अवरोध पुर्याएको आयोजनाको भनाइ छ।
जापानी कम्पनी हाज्मा कर्पोरेसनले निर्माण जिम्मा पाएको यो आयोजनामा अहिले सुरूङ खन्ने काम भइरहेको छ। वडा अध्यक्ष सुर्खेती आफैंले पहिले आयोजनासँग गरेको सम्झौताविपरीत काम रोक्नेसम्मको आन्दोलनको कार्यक्रम सार्वजनिक भएको छ। आयोजनाले भने आफ्नो कार्यक्षेत्र तथा अधिकारि क्षेत्रभित्र पर्ने काम गरिरहेको जनाएको छ।
आयोजना तयारी गर्दा डिजाइनमा परेका काम भने कार्यान्वयन चरणमा रहेको आयोजनाले आयोजनाकी इन्जिनियर कल्पना अधिकारिकले बताइन्। आयोजना निर्माण गर्दा खानेपानी प्रणालीमा अवरोध हुने अध्ययन क्रममै देखिएको थियो। खानेपानी मात्र होइन, सिँचाइका लागि बनाइएका परम्परागत कुलो तथा अन्य पूर्वाधार पुनर्निर्माणका लागि चन्द्रागिरि नगरपालिका र आयोजनाबीच यसअघि नै सम्झौता भइसकेको छ।
उक्त सम्झौतामा नगरपालिकाका तर्फबाट मेयर घनश्याम गिरी र २ नम्बर वडा अध्यक्ष गोपी सुर्खेतीले नै हस्ताक्षर गरेका थिए। उक्त सम्झौताभन्दा बाहिर गएर अहिले मागहरू आएको आयोजनाले जनाएको छ। ‘हामीले खानेपानीका लागि व्यवस्थापन, स्थानीयलाई रोजगारी दिनेजस्ता कुरा कार्यान्वयन गरिसकेका छौं। बाँकी कुरा सम्झौताअनुसार हुनुपर्ने काम हुँदै जानेछ। हाम्रो क्षेत्राधिकारभन्दा बाहिर गएर आएका मागका बारेमा केही भन्न सक्ने अवस्था छैन,’ अधिकारीले भनिन्।
त्यस्तै, खानेपानी निर्माण सन्दर्भमा यसअघि वडाध्यक्ष सुर्खेतीले हस्ताक्षर गरेको सम्झौतामा आयोजनाले खानेपानीको पूर्वाधार बनाइदिने र त्यसको सञ्चालन नगरपालिकाले नै गर्ने उल्लेख गरिएको छ। खानेपानी सशुल्क वा निःशुल्क भन्ने कुरा नगरपालिकाकै अधिकार क्षेत्रभित्र पर्ने उक्त सम्झौताको व्यवस्था छ।
खानेपानीका लागि आयोजनाले बोरिङ गरेर त्यसको व्यवस्थापन गरिरहेको छ। आयोजनाले खानेपानीका लागि बोरिङ गरेको कुरा वडाअध्यक्ष सुर्खेतीले पनि स्वीकार गरेका छन्। तर त्यसरी आएको पानी सबै वडावासीले निःशुल्क पाउनुपर्ने उनको भनाइ छ।
‘खानेपानीको काम त भइरहेको छ। तर सिंचाइका लागि पानीको व्यवस्थापन हुनुपर्ने र त्यो भन्दा महत्वपूर्ण सुरुङ माथिको जमिनको क्षतिपूर्तिको व्यवस्था गर्नुपर्ने हाम्रो माग हो,’ बडाअध्यक्ष सुर्खेतीले भने। आयोजनाका अनुसार स्थानीयले फुटबल मैदान बनाउने मागसमेत राखेका छन्।
सुरूङमाथिको जमिनको मुआब्जा दिने डिजाइनमा पनि नभएको आयोजनाले जनाएको छ। नेपालमा यसअघि सुरुङमार्ग नबनेको र सुरुङमाथिको जमिनमा के हुन्छ भन्ने विषय नयाँ भएको आयोजनाको भनाइ छ।
सुरूङ मार्ग निर्माण गर्दा सबभन्दा धेरै प्रभावित चन्द्रागिरी नगरपालिकाको ३ र ५ नम्बर वडा र २ नम्बर वडा रहेका छन्। सुरुङ मार्ग माथिको अधिकांश जमिन २ नम्बर वडामा पर्ने भएकाले त्यहाँका वडाअध्यक्षको नेतृत्वमा स्थानीय आन्दोलित भएका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
