काठमाडौं- वैदेशिक रोजगार विभागले अनलाइन प्रणालीमार्फत पुनः श्रम स्वीकृति दिन सुरु गरेको छ। अनलाइन सेवा सुरु भएसँगै अब घरबाटै पुनः श्रम स्वीकृति (रि-इन्ट्री) लिन सक्ने विभागले जानकारी दिएको छ।
विभागको अनलाइन प्रणालीबाट बायोमेट्रिक्स आँखाको स्क्यान वा फिंगर प्रिन्ट गरेर श्रम स्वीकृति लिएपछि अनलाईनमार्फत रिइन्ट्री गर्न सकिनेछ। अनलाईनमार्फत रिइन्ट्रीका लागि वैदेशिक रोजगार विभागको वेभसाइटमा अनलाइन श्रम स्वीकृति (एफईआईएमएस) मार्फत फारम भर्नुपर्ने हुन्छ। फारम भरिसकेपछि शाखा छान्नुपर्ने हुन्छ।
श्रम स्वीकृतिका क्रममा कुनै कारणले आवेदन रद्द भएमा कारणसहितको जानकारी विभागमा श्रम स्वीकृति लिँदा उपलब्ध गराएको मोबाइल नम्बर, इमेल तथा युजर अकाउन्टमा प्राप्त हुनेछ। जसका लागि श्रम स्वीकृति लिँदा प्रयोग गरेको मोबाइल नम्बर, युजर नाम तथा पासवर्ड सुरक्षित राख्नुपर्ने विभागले जानकारी गराएको छ।
फारममा सबै विवरण भरेर एफईआईएमएसमा पठाएपछि सम्पूर्ण विवरण ठीक भए श्रम स्वीकृतिको निस्सा एफईआईएमएसको युजर अकाउन्ट र इमेलमा प्राप्त हुन्छ। यसलाई आवश्यकताअनुसार प्रिन्ट गर्न वा सेभ गर्न सकिनेछ।
विभागले म्यादी जीवन बीमा र कल्याणकारी कोषको रकम समेत अनलाइन भुक्तानी गर्न सकिने व्यवस्था गरिसकेको बताएको छ। अनलाइन भुक्तानी गर्न कुनै प्रकारको थप सेवा शुल्क बुझाउनु पर्ने छैन।
अनलाइनमार्फत पुनः श्रम स्वीकृति सुरु भएसँगै कार्यालय उपस्थित भइरहनु पर्ने बाध्यताको अन्त्य हुने भएकाले सेवाग्राहीलाई थप सहज हुने विभागको अपेक्षा छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1782224905-1782225890.jpeg)
-1764146706.png)
