काठमाडौं- दाङ लमहीस्थित देउखुरी अन्तर्राष्ट्रिय क्रिकेट मैदानमा भइरहेको प्रधानमन्त्री कप टी ट्वान्टी महिला क्रिकेट प्रतियोगितामा प्रदेश नम्बर २ ले कर्णाली प्रदेशलाई १ सय ४३ रनले हराएको छ। १ सय ६६ रनको लक्ष्य पछ्याएको कर्णालीले पूरा ओभर खेल्दै ९ विकेट गुमाएर २२ रन मात्र बनाउन सकेको हो।
प्रदेश नम्बर २ ले टस जितेर ब्याटिङ रोज्दै पूरा ओभरमा ३ विकेट गुमाएर १ सय ६५ रन बनाएको थियो। जसका लागि अनुराधा चौधरीले ६० बलमा अविजित ६९ रन, शोभा आलेले २४ बलमा २३ रन, सन्तोषी चौधरीले १८ बलमा ७ रन र बिमला मगरले २५ बलमा २१ बनाए।
कर्णालीका लागि निशा पराजुलीले दुई साथै सुजता बोगटीले एक विकेट लिए। कर्णालीले बलिङमा अतिरिक्त रन नै ज्यादा खर्चिएको थियो। ४३ रन अतिरिक्त हुँदा टिमका लागि लक्ष्य थप मुस्किल बनेको हो।
१ सय ६६ रनको लक्ष्य पछ्याएको कर्णालीले पूरा ओभर खेल्दै ९ विकेट गुमाएर २२ रन मात्र बनाउन सक्यो। जसमा कसैले पनि दोहोरो अंकमा रन जोड्न सकेनन्। तृसना विश्वकर्माले २६ बलमा ७ रन, अन्सु शाक्यले ८ बलमा १ रन, दिक्षा पुनले ४ बलमा २ रन, आयुशा टण्डनले ३८ बलमा ४ रन र दीपा रानाले २५ बलमा १ रन बनाए।
प्रदेश नम्बर २ का लागि सरस्वती कुमारी र कविता गौतमले तीन–तीन साथै सन्तोषी चौधरी र आरती चौधरीले एक–एक विकेट लिए। कर्णालीकी मोनिका राना रन आउट भएकी थिइन्।
प्रतियोगितामा प्रदेश नम्बर २ र कर्णाली दुवै बाहिरिसकेका छन्। समूहबाट एक खेल अगावै लुम्बिनी प्रदेश र एपिएफ सेमिफाइनलमा पुगेका हुन्। सोमबार नै समूहको अन्तिम खेलमा लुम्बिनी र एपिएफ खेल्दै छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
