फाइल तस्बिर
काठमाडौं- नेपाल आयल निगम (एनओसी) र भारतीय आयल निगम (आइओसी) ले नेपाल–भारत दोस्रो पेट्रोलियम पाइपलाइनको विस्तृत प्राविधिक सर्वेक्षण (डिटेल इन्जिनियरिङ सर्भे) टुंग्याएको छ।
नेपाल आयल निगम १ नम्बर प्रादेशिक कार्यालय प्रमुख नकुलप्रसाद भण्डारीका अनुसार संयुक्त प्राविधिक अध्ययन टोलीले आयोजनाका सम्भाव्यता अध्ययन प्रतिवेदन तयार पारेको हो। ‘सरकारले चालु आर्थिक वर्षको नीति तथा कार्यक्रममा राखेको दोस्रो अन्तरदेशीय पेट्रोलियम पाइपलाइनका रुपमा रहेको सिलिगुरी–झापा पेट्रोलियम परियोजनाको डिटेल इन्जिनियरिङ सर्भे सकिएको छ‚’ भण्डारीले भने।
गतवर्ष पुस २७ र २८ गते भारतको नयाँ दिल्लीमा सम्पन्न ‘नेपाल–भारत पेट्रोलियम तथा ग्यास जोइन्ट वर्किङ’ ग्रुपको पहिलो बैठकमा भारतको सिलगुडीबाट नेपालको झापासम्म दोस्रो अन्तरदेशीय पेट्रोलियम पाइपलाइ विस्तार गर्ने तथा मोतिहारी–अमलेखगंज पाइपलाइनलाई विस्तार गर्ने प्रारम्भिक सहमति भएको थियो। सोही निर्णयलाई कार्यान्वयनमा लैजान संयुक्त टोलीले स्थलगत अध्ययन गरी विस्तृत इन्जिनियरिङ रिपोर्ट तयार पारेको हो।
पेट्रोलियम पदार्थको सहज आपूर्ति, ढुवानी तथा वितरणका लागि भारतको मोतिहारीदेखि नेपालको अमलेखगन्ज डिपोसम्म पेट्रोलियम पाइपलाइन सञ्चालनमा आइसकेको छ। यसलाई थप विस्तार गर्दै नेपाल आयल निगमले अमलेखगन्जबाट चितवनको लोथरसम्म पेट्रोलियम पाइपलाइन विस्तार गरी भण्डारण क्षमतासमेत विस्तार गर्ने लक्ष्यसमेत लिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
