काठमाडौं- नेपाली राष्ट्रिय टिमको प्रशिक्षकमा नियुक्त भएका डेभ वाटमोरले नयाँ चुनौतीको प्रतीक्षा रहेको बताएका छन्। श्रीलंकालाई सन् १९९६ मा प्रशिक्षकको रुपमा विश्वकप क्रिकेटको उपाधि जिताएका वाटमोर छनोटको लामो प्रक्रियापछि बिहीबार मुख्य प्रशिक्षकमा नियुक्त भएका थिए।
नेपाल क्रिकेट संघ (क्यान)ले पहिलो पटक खुला आवेदनमार्फत प्रशिक्षक माग गरी विभिन्न चरण पूरा गर्दै एक वर्षको सम्झौतामा वाटमोरलाई मुख्य प्रशिक्षकमा नियुक्त गरेको हो।
नेपाली राष्ट्रिय टिमको नयाँ प्रशिक्षकको नियुक्तिपछि स्पोर्टस् म्यानेजमेन्ट कम्पनी ‘फस्ट स्पोर्टस् इभेन्ट’ ले ट्वीटमार्फत दिएको बधाईमा प्रतिक्रिया दिँदै वाटमोरले अगाडि महत्वपूर्ण जिम्मेवारी रहेको र त्यसमा नयाँ चुनौतीका लागि तयार रहेको उल्लेख गरेका हुन्।
डेभ वाटमोर आफ्नो समयका उम्दा खेलाडी हुन्। राइट ह्यान्डेड ब्याट्सम्यान वाटमोरले अस्ट्रेलियाबाट सात टेस्ट, एक एकदिवसीय, १०८ फस्ट क्लास र २६ लिष्ट ए क्रिकेट खेलेका छन्।
२००३ देखि २००७ सम्म बंगलादेशको प्रशिक्षक भएर पनि काम गरे। बंगलादेशको क्रिकेटलाई विश्व जगतमा चिनाउन उनको भूमिका महत्वपूर्ण मानिन्छ।
एक समय भारतीय क्रिकेट टिमको प्रशिक्षकको रुपमा चर्चा गरिएका वाटमोरले भारतको यु–१९ राष्ट्रिय क्रिकेट टिमको जिम्मेवारी पनि सम्हालेका छन्। २००८ मा विराट कोहलीको कप्तानीमा भारतले यु–१९ विश्वकपको उपाधि जित्दा प्रशिक्षकमा उनै वाटमोर थिए। त्यसका साथै भारतको राष्ट्रिय क्रिकेट एकेडेमीको डाइरेक्टर भएर पनि उनले काम गरे।
यस्तै उनले इन्डियन प्रिमियर लिग आइपिएलमा कोलकाता नाइट राइडर्सको प्रशिक्षकको रुपमा पनि काम गरे।
उनी २०१२ मा पाकिस्तान राष्ट्रिय क्रिकेट टिमको प्रशिक्षक बने। उनकै प्रशिक्षणमा पाकिस्तानले एसिया कपको उपाधि समेत जितेको थियो। उनी २०१२ देखि २०१४ सम्म पाकिस्तानको प्रशिक्षक भूमिकामा रहे।
पाकिस्तानपछि २०१४ को डिसेम्बरमा वाटमोर जिम्बाब्वेको प्रशिक्षक बने। जिम्बाब्वेसँग ९ महिनाको सम्झौता बाँकी रहँदै बर्खास्त भएका वाटमोर त्यसपछि २०१७ मा केरला क्रिकेट एसोसिएसनको मुख्य प्रशिक्षक बने। उनी २०२० को फेब्रुअरीमा सिंगापुर राष्ट्रिय क्रिकेट टिमको प्रशिक्षक बने। उनले सिंगापुरलाई एसीसी टि–२० एसिया कपमा छनोट गराए।
वाटमोरले नेपाली खेलाडीहरुलाई यसअघि प्रशिक्षण दिइसकेका छन्। ब्याट एण्ड बल फाउण्डेसनले आयोजना गरेको हाई पर्फर्मेन्स क्याम्पमा ११ दिन नेपाली खेलाडीहरुलाई प्रशिक्षण दिएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1693220145.jpg)
-1786602170.png)
