‘अहिलेको नेतृत्वले निर्माण व्यवसायीको समस्या समाधानमा पहल गरोस्’

पूर्वाधार

‘अहिलेको नेतृत्वले निर्माण व्यवसायीको समस्या समाधानमा पहल गरोस्’महासंघका पदाधिकारीलाई निर्माण व्यवसायीको सम्मान

नेपाल लाइभ शुक्रबार, पुस ३, २०७७ १५:०७

काठमाडौं- नेपाल निर्माण व्यवसायी महासंघले नेपाल उद्योग वाणिज्य महासंघको ५४औं साधारण सभा एवं निर्वाचनबाट नवनिर्वाचित अध्यक्ष, पदाधिकारी तथा वस्तुगततर्फका कार्यकारिणी सदस्यलाई सम्मान गरेको छ। बिहीबार एक कार्यक्रममा निर्माण व्यवसायी महासंघका अध्यक्ष रवि सिंहले निर्माण व्यवसायीका समस्याहरुबारे जानकारी गराएका थिए।

नेपाल उद्योग वाणिज्य महासंघको विगतको नेतृत्वले निर्माण व्यवसायीका समस्याहरु समाधान गर्न नसकेको उल्लेख गर्दै अध्यक्ष सिंहले अब त्यस्तो परिस्थिति नदोहोरिने विश्वास व्यक्त गरे। सशक्त वस्तुगत सदस्यको हैसियतले निर्माण व्यवसायी महासंघले उद्योग वाणिज्यमहासंघसँगको सम्बन्धलाई अझ प्रगाढ बनाउँदै लैजाने अध्यक्ष सिंहले बताए।

‘निजी क्षेत्रमाथि चारैतिरबाट औला ठड्याउँदै चौतर्फी प्रहार भइरहेको अवस्थामा निजी क्षेत्रका संघ संस्थाहरुबीच सहकार्यको विकल्प छैन,’ अध्यक्ष सिंहले भने। सरकारले निजी क्षेत्रलाई आफ्नो स्वार्थ अनुसार प्रयोग मात्रगर्दै आइरहेको आरोप सिंहले लगाए।

कोभिड–१९ का कारण निर्माण क्षेत्र आक्रान्त भएकाले समस्या समाधानका लागि सरोकारवाला निकायलाई पटकपटक पत्रचार गर्दा पनि कुनै सुनुवाई नभएको सिंहले बताए। निर्माण व्यवसायी महासंघको मागलाई सम्बोधन गर्ने विषयमा अब उद्योग वाणिज्य महासंघले पनि ठोस पहल गर्ने विश्वास उनले व्यक्त गरे। नेपाल उद्योग वाणिज्य महासंघका अध्यक्ष शेखर गोल्छाले समस्याग्रस्त निजी क्षेत्र कोभिड–१९ का कारण थपमारमा परेको उल्लेख गरे।

निर्माण क्षेत्रको समस्याबारे आफू जानकार रहेको बताउँदै अध्यक्ष गोल्छाले म्याद थपको माग जायज रहेको स्वीकार गरे। नेपाल उद्योग वाणिज्य महासंघको भूमिकालाई अझ प्रभावकारी बनाउन निर्माण व्यवसायी महासंघ जस्ता वस्तुगत संघबाट रचनात्मक सहयोगको अपेक्षा गरेको गोल्छाले बताए।

महासंघलाई अझ सुदृढ संस्थाको रुपमा विकास गर्न ‘भिजन पेपर’ निर्माणको तयारी भइरहेको भन्दै उनले आवश्यक सरसल्लाह दिन आग्रह गरे। निर्माण व्यवसायी महासंघका वरिष्ठ उपाध्यक्ष निकोलस पाण्डेले धर्मराउँदो निजी क्षेत्रलाई सम्हाल्ने दिशामा उद्योग वाणिज्य महासंघको वर्तमान नेतृत्वबाट आफू अत्यन्त आशावादी रहेको बताए। विकास बजेटको सबैभन्दा बढी भार बोक्ने क्षेत्र निर्माण व्यवसाय नै रहेको जानकारी गराउँदै पाण्डेले प्रत्यक्ष तथा अप्रत्यक्ष रुपमा ८ लाख बढीलाई निर्माण व्यवसयाले नै रोजगारी दिएको उल्लेख गरे।

देशको अर्थतन्त्रलाई चलायमान बनाउन निर्माण क्षेत्रको भूमिका अपरिहार्य रहेको उनको तर्क थियो। कार्यक्रममा निर्माण व्यवसायी महासंघका अध्यक्ष रवि सिंह, सल्लाहकार रमेश शर्मा, सल्लाहकार ग्याल्जे शेर्पालगायतले उद्योग वाणिज्य महासंघको ५४औं साधारण सभा एवं निर्वाचनबाट निर्वाचित अध्यक्ष, पदाधिकारी एवं वस्तुगततर्फका कार्यकारिणी सदस्यहरुलाई सम्भान गरिएको थियो।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

भूकम्पको पूर्वानुमान किन प्रायः मिल्दैन, वैज्ञानिकहरू किन गर्न खोज्दैनन्

जात्रा प्रभावित हुनेगरी सभा र कार्यक्रम नगर्न काठमाडौँ महानगरको अनुरोध

तस्करीका सामान सेटिङमा छुटाउने प्रहरीका सई ३० हजार घुससहित पक्राउ