काठमाडौं–भौतिक पूर्वाधार तथा यातायातमन्त्री वसन्तकुमार नेम्वाङले झापाका तीन वटा पुल आयोजनाको स्थलगत अनुगमन गरेका छन्। शनिबार रुग्ण अवस्थामा रहेका झापाका विरिङ खोला पुल, माईखोला पुल र झापा–मारेङको सिमानामा रहेको रतुवा पूलको अनुगमन गरेका हुन्।
निरीक्षण गर्दै नेम्वाङले स्थानीय बासिन्दा तथा स्थानीय निकायका जनप्रतिनिधिसँग पुल निर्माणमा देखिएका समस्याका विषयमा छलफलसमेत गरेका थिए। मन्त्री नेम्वाङले लामो समयदेखि रुग्ण भएकाले समस्या समाधानका लागि अनुगमनमा आएको भन्दै उक्त आयोजनाहरुको काम अगाडि बढाउन कार्ययोजना बनाएर अघि बढ्न आयोजना प्रमुख तथा निर्माण व्यवसायीलाई निर्देशन दिइसकेको बताए।
तीन वटा पुलमध्ये रतुवा पुल निर्माण कार्य सकिए पनि नदीले धार परिवर्तन गरेपछि त्यहाँ समस्या देखिएको छ। उक्त समस्या समाधानको माग गर्दै स्थानीय तहका प्रमुखहरुले ज्ञापनपत्र बुझाएका छन्।
पूलको निरीक्षणपछि मन्त्री नेम्बाङले पुल निर्माणमा देखिएका समस्या समाधानका लागि त्यसका विस्तृत प्राविधिक पक्षहरु अध्ययन गरिने बताए। ‘यस्ता समस्या ग्रस्त आयोजनालाई त्यतिकै छाडिदैन। के गर्ने हो तुरुन्तै निर्णय हुन्छ,’ उनले भने।
मन्त्री नेम्बाङले समस्या देखिएकैले आफुले मन्त्रालय मातहत कार्यान्वयन गर्ने मन्त्रालयका सचिव, महानिर्देशक, आयोजना प्रमुखसहित अनुगमनमा आएको बताए। उनले आयोजनाहरुको काम जतिसक्दो चाँडो अगाडि बढाउनु पर्ने भन्दै कार्ययोजना बनाएर कार्यान्वयनमा लाग्न निर्देशन दिए।
हुलाकी राजमार्गमा पर्ने तीनवटै पुलको अनुगमनमा मन्त्री नेम्बाङसहित झापा ४ का सांसद एलपी सावाँ, मोरङ १ का सांसद घनश्याम खतिवडा, भौतिक पूर्वाधार तथा यातायात मन्त्रालयका सचिव रवीन्द्रनाथ श्रेष्ठ, सडक विभागमा महानिर्देशक केशवकुमार शर्मा र हुलाकी राजमार्गका आयोजना प्रमुख रोहित विसुराललगायत सहभागी थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
