काठमाडाैं-८ वर्षदेखि अलपत्र बालाजु-ककनी-रानीपौवा-पिपलटार सडक कालोपत्रे सुरु भएको छ। सहरी विकास राज्यमन्त्री रामवीर मानन्धरको निरन्तरको पहलपछि कालोपत्रे सुरु भएको हो।
विवादित ठेकेदार शारदाप्रसाद अधिकारीको शैलुङ कन्ट्रक्सनले मुड्खु-तीनपीप्ले खण्डमा कालोपत्रे सुरु गरेको हो। महत्वपूर्ण आयोजनाहरूको ठेक्का हत्याउने तर काम नगर्ने ठेकेदार अधिकारीलाई निरन्तरको ताकेतापछि कालोपत्रे सुरु गरिएको हो। राज्यमन्त्री मानन्धरले सडक कालोपत्रे गर्न अधिकारीको शैलुङ कन्ट्रक्सनलाई निरन्तर ताकेता गर्नुपरेको हो।
नेपाल कम्युनिस्ट पार्टी (नेकपा) का अध्यक्ष पुष्पकमल दाहाल 'प्रचण्ड'का घरबेटीसमेत रहेका ठेकेदार अधिकारीलाई काम नगरे कारबाही गर्ने मन्त्री मानन्धरको चेतावनीपछि कालोपत्रे र सडक पेटी निर्माण सुरु भएको हो। मंसिरभित्र कालोपत्रेको काम सुरु नगरे ठेक्का रद्द गरेर थप कानुनी कारबाहीको चेतावनी पाएपछि अधिकारीले काम सुरू गरेका हुन्।
मुड्खु-तीनपीप्ले खण्डका सुपरभाइजर अनुप अधिकारीले आज सोमबार पहिलो चरणको कालोपत्रे सकिने बताएका छन्। राज्यमन्त्री मानन्धरका स्वकीय सचिव जयप्रकाश श्रेष्ठका अनुसार आज तीनपीप्लेनजिकै ठूलोगाउँसम्म सडक कालोपत्रे हुने छ । काठमाडौं जिल्लातर्फको सडक कालोपत्रे यो महिनाभित्र सक्न अधिकारीलाई ताकेता गरिएको श्रेष्ठले जानकारी दिए ।
अधिकारीले ठेक्का लिएर झण्डै एक दशकदेखि अलपत्र पारेको पासाङल्हामु राजमार्गको बालाजु-रानीपौवा खण्डको कालोपत्रेको काम सुरू भएसँगै स्थानीय पनि खुसी भएका छन्।
सडक भत्काएर बाटो बिगारिदिँदा निकै समस्यामा परेका राजधानीको उत्तरी भेग र नुवाकोटका बासिन्दा भएका हुन् । सरकारले पटक-पटक ध्यानाकर्षण गराउँदासमेत काम भएको थिएन। पहिलो चरणमा बाइपासदेखि पाँचमानेसम्मको सडक जसरी पनि कालोपत्रे गराउने गरी राज्यमन्त्री मानन्धरले ठेकेदार अधिकारीलाइ निरन्तर ताकेता गरिरहेका थिए। उक्त खण्ड मन्त्री मानन्धरको निर्वाचन क्षेत्र पनि हो।
कालोपत्रेको अनुगमन गर्न राज्यमन्त्री मानन्धर पनि फिल्डमै पुगेका थिए। उनले पाँचमानेसम्मको सडक कालोपत्रे भएपछि ककनीतर्फको पनि सुरु गर्न ठेकेदार अधिकारीको कम्पनीलाई निर्देशन दिइसकिएको बताए। उनले देशभरिका सडक लगायतका भौतिक विकासका आयोजना निर्माणले अब गति लिने पनि दाबी गरेका छन्।
नुवाकोटका प्रमुख जिल्ला अधिकारी झंकनाथ ढकालले पनि सडक कालोपत्रे गरिदिन शैलुङ कन्ट्रक्सनलाई निरन्तर ताकेता गर्दै आएका थिए । यसअघि भौतिक पूर्वाधार तथा यातायातमन्त्री बसन्त नेम्वाङ र राज्यमन्त्री मानन्धरसँग पनि नुवाकोटका संघीय सांसद नारायण खतिवडासहितको टोलीले छलफल गरेको थियो ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778245878.png)
-1764146706.png)
