काठमाडौं- सेयर बजारले बिहीबार नेप्से सूचक र कारोबार रकम दुबैमा नयाँ रेकर्ड बनाएको छ। बिहीबारको सुधारसँगै नेप्से सूचक इतिहासकै सर्वाधिक उचाइमा पुगेको हो। सेयर बजारले चार वर्ष ४ महिना अगाडिको अधिकतम रेकर्डलाई उछिनेको हो।
बिहीबार कारोबार सुरु भएदेखिनै बजार सुधार हुन थालेको थियो। प्रि ओपनिङ सेसनमै नेप्से सूचक सवार्धिक बढि भइसकेको थियो। १२ बजेर १४ मिनेटसम्ममा नेप्से सूचक १९२५ अंक पुगिसकेको थियो। बिहीबारको बजार सुधारमा सबैभन्दा धेरै योगदान वाणिज्य बैंकहरुको थियो। वाणिज्य बैंकको सूचक सुधार हुने बित्तिकै गएका दिनमा सर्वाधिक सुधार भएका कम्पनीको नाफा बुक गर्ने क्रम बढ्यो।
नाफा बुक गरेर वाणिज्य बैंकको मूल्य बढ्दै गर्दा गएका दिनमा वाणिज्य बैंकको सेयर किन्ने लगानीकर्ताले समेत नाफा बुक गर्न खोज्दा ५० अंकभन्दा माथिको सुधार अन्तिममा १८.४३ अंकले मात्रै सुधार भएर बन्द भयो।
थोरै सेयर भएका कम्पनीलाई कर्नरिङ गरे जस्तो सजिलो ठुला कम्पनीहरुमा धेरै गाह्रो हुन्छ। ८ अर्बभन्दा माथि सेयर पुँजी भएका वाणिज्य बैंकको कम्तिमा ३० प्रतिशत सेयर सर्वसाधारण सँग हुन्छ। त्यसैले गर्दा साना कम्पनीको मूल्य बढाएजस्तो सजिलो वाणिज्य बैंकको हुँदैन।
कारोबार सुरु हुने बित्तिकै सर्किट लागेको नविल बैंक अन्तिममा ८ प्रतिशतले मात्रै सुधार भयो। बिहीबार होटल, व्यापार, विकास बैंक, फाइनान्स, निर्जीवन बीमा कम्पनी, माइक्रोफाइनान्स र जीवन बीमा कम्पनीका सेयरधनीले नाफा बुक गरेका छन्। यी सूचकमा गएका दिनमा अत्यधिक सुधार भइसकेको छ। लगानीकर्ताले यी सूचकमा जस्तै वाणिज्य बैंकको सूचकमा पनि उछाल आउने अपेक्षा गरेका थिए। तर बजारले नै नियन्त्रण गरेपछि ५० अंकको सुधार टिक्न सकेन।
यस अगाडिको सर्वाधिक धेरै अंक २०७३ साउन १२ गते १८८१ थियो। यो रेकर्डलाई ४ वर्ष चार महिनापछि बिहीबार १८९३.२४ अंकमा पुगेर बन्द भएको छ। त्यस्तै सबैभन्दा धेरै कारोबारको अधिकतम रेकर्ड यही आइतबारको थियो। आइतबार ६ अर्ब ९० करोड रुपैयाँको कारोबार भएको थियो। बिहीबार इतिहासकै सबैभन्दा धेरै ७ अर्ब ६१ करोड रुपैयाँको कारोबार भएको छ। विगत एक वर्षको अवधिमा सेयर बजार ७९१ अंकले सुधार भएको छ।
सेयर बजारले २०७३ साउन १२ गते इतिहासकै सबैभन्दा धेरै कायम गरेर तल झरेको थियो। साउन १२ गते अधिकतम विन्दु बनाएर तीन वर्षसम्म तल झरेको सेयर बजार बिहीबारको सुधार सँगै नयाँ रेकर्ड कायम गर्न सफल भएको हो। सेयर बजार चार वर्षको अवधिमा सबैभन्दा तल ११०२ अंकसम्म तल झरेको थियो। विगत एक वर्षको अविधमा ११०२ अंकबाट सुधार हुन थाले बजार बिहीबार ७९१ अंकले सुधार भइसकेको छ।
यस अवधिमा थोरै सेयर पुँजी भएका कम्पनीको मूल्यमा उछाल आएको छ। अर्को तर्फ सर्वसाधारणतर्फ थोरै सेयर पुँजी भएका कम्पनीमा खेलाडीको बढी चलखेल रहेको छ। यस्तो समयमा लगानीकर्ताले संयमित भएर लगानी गर्नुपर्ने विज्ञहरु बताउछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
-1788425345.png)
