काठमाडौं–भारतीय विदेशसचिव हर्षवर्धन श्रृंगला नेपाल भ्रमणमा आइपुगेका छन्। उनी ११ बजे त्रिभुवन अन्तर्राष्ट्रिय विमानस्थल ओर्लिएका हुन्। उनी दुई दिने औपचारिक भ्रमणका लागि आएका हुन्।
दुई देशबीचको लामो संवादहीनताका बीच भारतीय विदेशसचिवको औपचारिक भ्रमण भएको हो। उनको भ्रमणमा अन्य धेरै एजेण्डा भए पनि नेपालले सीमा विवादका बारेमा पनि कुराकानी गर्ने तयारी गरेको छ।
भारतीय प्रधानमन्त्री नरेन्द्र मोदीलाई उच्चस्तरीय राजनीतिक संवाद गर्न नेपाल तयार रहेको सन्देश पठाउने तयारीमा नेपाली पक्ष रहेको छ। सीमा र नेपाल–भारत प्रबुद्ध व्यक्तिहरुको समूह (इपिजी)ले तयार पारेको प्रतिवेदनको विषयसमेत नेपाली पक्षले कुरा उठाउने तयारी गरेको छ। इपिजी प्रतिवेदन केही वर्षदेखि अलपत्र रहेको छ। त्यसलाई दुवै देशले वुझेर थप छलफलमा लैजानुपर्ने चाहना नेपालको छ। यही सन्देश नेपालले मोदीलाई दिन चाहेको छ।
विदेश सचिवको भ्रमणमा द्विदेशीय राजनीतिक नक्सा र सीमांकन समस्यालाई प्राथमिकतामा राखेर कुराकानी गरिने परराष्ट्र मन्त्रालयले जनाएको छ। यसबारे औपचारिक छलफलको एजेन्डा नभए पनि अनौपचारिक रुपमा कुरा गर्ने तयारी भएको मन्त्रालयले जनाएको छ।
विदेश सचिवको भ्रमण अवसरमा बिहीबारै सचिवस्तरीय संयन्त्रको बैठकसमेत हुने भएकाले प्रधानमन्त्री केपी शर्मा ओलीको निर्देशनअनुसार नेपालको कालापानी, लिपुलेक, लिम्पियाधुराको भौगोलिक अवस्थिति र प्रामाणिक आधारमा नेपालले सार्वजनिक गरेको नयाँ राजनीतिक नक्साबारे कुराकानी गर्ने तयारी नेपाली पक्षले गरेको हो।
परराष्ट्र सचिव भरतराज पौड्यालले द्विदेशीय सीमावर्ती मामिलासहित प्रबुद्ध समूह (ईपीजी) को अड्किएको रिपोर्ट, ट्रान्समिसन लाइन, आर्थिक सहयोग एवं व्यापार, ऊर्जालगायतका विषयमा कुराकानी गर्ने प्रारम्भिक एजेन्डा तय भएको परराष्ट्र मन्त्रालयले जनाएको छ। भारतका नवनियुक्त विदेश सचिव श्रृंगलाको नेपालमा पहिलो शिष्टाचार भ्रमण भए पनि द्विदेशीय सम्बन्धको जटिलता र सामयिक परिस्थिति हेरेर नेपालले बहुपक्षीय एजेन्डा प्रस्तुत गर्ने मन्त्रालयले बताएको छ ।
परराष्ट्र प्रवक्ता सेवा लम्सालका अनुसार बिहीबार दिउँसो याक एन्ड यती होटलमा सुरु हुने भनिएको द्विदेशीय सचिवस्तरीय संयन्त्र बैठकपछि विदेश सचिव श्रृंगलाले प्रधानमन्त्री ओली तथा राष्ट्रपति विद्यादेवी भण्डारीसँग शिष्टाचार भेट गर्ने कार्यक्रम छ । श्रृंगलाले परराष्ट्रमन्त्री प्रदीप ज्ञवालीसँग पनि शिष्टाचार भेटवार्ता गर्दैछन्।
सन् १९८७ मा गठन भएको परराष्ट्र सचिवस्तरीय संयन्त्रले नियमित र अर्थपूर्ण रूपमा काम गर्न नसकेको समयमा उनको भ्रमण भएकाले यसलाई उपलव्धी लक बनाउने नेपालको तयारी छ।
झन्डै एक वर्ष लामो कूटनीतिक र राजनीतिक संवादहीनतापछि ‘पोजिटिभ नोट’ का रूपमा देखापरेको भारतीय विदेश सचिव श्रृंगलाको यो भ्रमणलाई नेपालले उपयोग गर्नैपर्ने अवस्था रहेको छ। यो पटक सचिवस्तरीयमा भएको वार्ता सफल भएमा राजनीतिक तहमा पनि वार्ता गर्ने बाटो खुल्नेछ। यसले नेपाललाई भारतसँग उच्चस्तरीय वार्ता गर्न सहयोग गर्ने छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791388337.png)
