काठमाडौं- सरकारले भारत र बंगलादेशमा नियमित व्यावसायिक उडान सुरु गर्ने निर्णय गरेको छ। बुधबार प्रधानमन्त्री निवास बालुवाटारमा बसेको मन्त्रिपरिषद् बैठकले यस्तो निर्णय गरेको बैठकमा सहभागी एक मन्त्रीले नेपाल लाइभलाई जानकारी दिए।
'भारतमा बंगलादेशमा उडान खुला गर्ने निर्णय भएको छ,' ती मन्त्रीले भने। यसअघि यी देशमा उडान हुने भएपनि नेपालीहरू मात्र ती देशबाट नेपाल आउन पाउने व्यवस्था थियो। अब यी देशबाट प्रक्रिया पुर्याएका व्यक्ति नेपाल आउन पाउने भएका छन्।
यस्तै बुधबारकै बैठकले भिजिट भिसा र अनअराइभल भिसामा पर्यटकहरूलाई नेपाल आउने विदेशीका लागि अनुमति दिने निर्णयसमेत गरेको छ।
'भिजिट भिसा र अनअराइभल भिसामा नेपाल आउने विदेशीका लागि अनुमति दिने निर्णय भएको छ,' ती मन्त्रीले भने। यसअघि हिमाल आरोहण र ट्रेकिङका लागि आउने पर्यटकले मात्र नेपाल प्रवेशका लागि भिसा पाउने व्यवस्था थियो।
गत चैत ११ गते सरकारले पहिलोपटक लकडाउन घोषणा गर्नुअघि नै यस्ता भिसामा विदेशीलाई नेपाल प्रवेश गर्न रोक लगाइएको थियो।
यसका साथै तीन जनालाई सचिवमा बढुवा गर्ने निर्णय गरेको समेत उनको भनाइ छ। उनका अनुसार सहसचिवहरू सुरेश आचार्य, गोकर्ण दवाडी र योगेन्द्रकुमार कार्कीलाई सचिवमा बढुवा गर्ने निर्णय भएको हो
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
