काठमाडौं- पाकिस्तान गोजुरियो कराते महासंघको आयोजनामा भएको ओपन २०२० वर्ल्ड वाईड ई-काता च्याम्पियनसिपमा नेपालले ३ स्वर्ण, ५ रजत र ३ कास्यसहित १० पदक जितेको छ।
नेपाली खेलाडी सञ्जु देशार, सुबिता गौतम र अनुभा मंग्रातीले नेपालका लागि स्वर्ण दिलाएका हुन्। महिला १४ देखि १८ वर्ष एडभान्स समूहमा सञ्जुले फिलिपिन्सकी काई डेनिस्टल बोनो अक्विनोलाई फाइनलमा पराजित गर्दै नेपालका लागि स्वर्ण दिलाएकी हुनु।
सुविता गौतमले नेपालकै जुलियाना मोक्तानलाई रजतमा खुम्चाउँदै स्वर्ण हात पारिन्। गौतमले १० वर्ष मुनि इन्टरमिडियट विधामा उक्त पदक प्राप्त गरेकी थिइन्। नेपालका लागि स्वर्ण जित्ने क्रममा अर्की खेलाडी अनुभाले ११ देखि १४ वर्ष इन्टरमिडियट विधामा नेपालकै नान्सी क्षेत्रीलाई पराजित गर्दै स्वर्ण पोल्टामा हालिन्।
१० दिन अगाडि मात्र क्यानडा कराते संघको आयोजनमा भएको सातो कप इन्टरनेशनल २०२० मा नेपाका लागि स्वर्ण दिलाएका प्रशिक्षक एवं खेलाडी रविन्द्र मानन्धर भने रजतमा नै खुम्चन बाध्य भए। मानन्धर पुरुष ४५ वर्ष एडभान्स विधामा मोरोक्कोका अजिर कायरसँग पराजित हुँदै रजतमा चिक्त बुझाए।
यस्तै २२ देखि ४५ महिला एडभान्स विधामा रिना श्रेष्ठ इटालीकी इलियोनोभा कोलेट्टोसँग पराजित हुँदै रजतमा नै चित्त बुझाउन बाध्य भइन्। सातो कपमा नै स्वर्ण दिलाउन सफल नेपाली अर्की खेलाडी निता आचार्य पनि रजतमा खुम्चिइन्। १९ देखि २१ वर्षको गल्र्स एडभान्स विधामा आचार्य इटालीकी सारा लङ्गोसँग पराजित भएकी थिइन्।
सत्कार घर्ती मगर र राजकुमार श्रेष्ठ भने कास्य पदकभन्दा माथि पुग्न सकेनन्। मगर १० वर्ष मुनि ब्वाइज एडभान्समा र राजकुमार २२ देखि ४५ वर्ष एडभानसमा पराजित हुँदै कास्यमा सीमित भएका हुन्।
२० देखि २१ नोभेम्बरसम्म सञ्चालित च्याम्पियनसिपमा नेपाल सहित १६ राष्ट्रका २५० खेलाडीहरुले आफ्नो कौशलता अनलाइन मार्फत प्रदर्शन गरेका थिए।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।