काठमाडौं- लामो समय रोकिएको नेपाली क्रिकेट मैदान फर्कने तयारीमा जुटेको छ। कोरोनाका कारण थला परेको क्रिकेट क्षेत्र फर्काउन बन्द प्रशिक्षणका लागि नेपाली राष्ट्रिय क्रिकेट खेलाडीको कोरोना परीक्षण गर्न मंगलबार स्वाब संकलन गरिएको छ।
मंगलबार नेपाल क्रिकेट संघ (क्यान) ले काठमाडौं उपत्यकामा भएका राष्ट्रिय क्रिकेट टिमका खेलाडीको कोरोना परीक्षणका लागि स्वाब संकलन गराएको हो। क्यानले अफिसियल र ग्राउन्ड स्टाफको पनि कोरोना परीक्षण गराएको छ। तर मंगलबार सबै खेलाडीको कोरोना परीक्षण भने भएको छैन।
क्यानले गत मंसिर ५ गते सूचना जारी गर्दै क्लोज क्याम्प गर्ने मिति र क्याम्पमा रहने खेलाडीको नाम सार्वजनिक गरेको थियो। १० गतेदेखि बन्द प्रशिक्षण गर्ने भनिए पनि अहिलेसम्म सबै खेलाडी काठमाडौं आइसकेका छैनन्। क्यानका सचिव अशोकनाथ प्याकुरेलले त्रिवि क्रिकेट मैदानमा खेलाडीको स्वाब संकलन गरिएको जानकारी दिए। उनले भने, ‘खेलाडी, अफिसियल र ग्राउन्ड स्टाफको कोरोना परिक्षणको लागि स्वाब संकलन गरिएको छ। तर अझै ६/७ जना खेलाडी उपत्यका बाहिर छन्। सबैको परीक्षण भएको छैन।’
बन्द प्रशिक्षण मंसिर १० गतेदेखि नै हुने क्यान सचिव प्याकुरेलले बताए। उनले थपे, ‘कोरोना परीक्षण भइसकेकाले मंसिर १० गतेबाट नै अभ्यास थाल्छन्। बाहिर रहेका खेलाडी आउँदै कोरोना परीक्षणपछि थपिँदै जान्छन्।’
मंगलबार कोरोना परीक्षणका लागि स्वाब संकलनपछि त्रिवि मैदानमा खेलाडी।
कोरोना भाइरस विश्वभर फैलिएसँगै नेपाल सरकारले गत वर्षको चैत पहिलो साताबाट खेलकुद गतिविधि ठप्प गर्ने निर्णय गरेको थियो। सरकारको निर्णयसँगै नेपाली क्रिकेट पनि ठप्प भएको थियो। अहिले क्यानले आइसिसी विश्वकप क्रिकेट लिग–२ को सिरिजलाई मध्यनजर गर्दै बन्द प्रशिक्षण राख्न लागेको हो।
बन्द प्रशिक्षणका लागि क्यानले २२ खेलाडीलाई बोलाएको छ। जसमा कप्तान ज्ञानेन्द्र मल्लसँगै पूर्वकप्तान पारस खड्का, उपकप्तान दीपेन्द्रसिंह ऐरी, सन्दीप लामिछाने, शरद भेषावकर, विनोद भण्डारी, करण केसी, सोमपाल कामी, रोहित कुमार पौडेल र बसन्त रेग्मी छन्। त्यस्तै, सुसन भारी, ललितनारायण राजवंशी, आरिफ शेख, पवन सर्राफ, अभिनाश बोहरा, सुबास खकुरेल, कुशल मल्ल, राशिद खान, कमलसिंह ऐरी, सन्दीप जोरा, किशोर महतो र भुवन कार्की रहेका छन्।
सन्दीप लामिछाने भने केही दिनको अभ्यासपछि बिग बास खेल्न अस्ट्रेलिया प्रस्थान गर्ने छन्। सन्दीपले यो पटक बिग बास होबर्ट हरिकेन्सबाट खेल्दै छन्। यसअघिको दुई सिजन भने सन्दीपले ग्लेन म्याक्सवेल कप्तानीमा रहेको मेलबर्न स्टार्सबाट खेलेका थिए।
एक महिनाभित्र नेपालले मुख्य प्रशिक्षक पाउने
नेपाली राष्ट्रिय क्रिकेट टिमले करिब एक महिनामा मुख्य प्रशिक्षक पाउने भएको छ। क्यानले केही दिनअघि मात्रै मुख्य प्रशिक्षकका उम्मेद्वारहरुसँग अन्तरवार्ता लिएको थियो।
खुला छनोटबाट मुख्य प्रशिक्षकको नियुक्ति गर्नको लागि क्यानले गत भदौमा दरखास्त आह्वान गरेको थियो। मुख्य प्रशिक्षकको लागि आवेदन परेका नामबाट ‘सर्ट लिस्ट’ तयार पारेर क्यानले आइसिसीलाई पठाएको थियो। आइसिसीले अनुमोदन गरेको लिष्टका उम्मेद्वारहरुसँग क्यानले अन्तरवार्ता लिएको हो।
अझै निकै लामो प्रक्रिया रहेकाले करिब एक महिना लाग्ने क्यान सचिव प्याकुरेल बताउँछन्। ‘हामीले अन्तरवार्ता सकेका छौं। फेरि पनि यी नाम आइसिसीलाई पठाउँछौं। अझै निकै प्रक्रिया बाँकी नै छ। यो बन्द प्रशिक्षणमा टिमले मुख्य प्रशिक्षक पाउँछन् तर अलिक समय लाग्छ। करिब एक महिनामा टुगो होला।’
मुख्य प्रशिक्षकका भारत, पाकिस्तान र श्रीलंकाका प्रशिक्षकहरुको नाम रहेको खबरहरु आइरहे पनि क्यानले आधिकारिक रुपमा अन्तर्वार्तामा सामेल भएकाहरुको नाम बताएको छैन। त्यसमा नेपाली टिमका पूर्वप्रशिक्षक पुबुदु दासानायकेको पनि नाम सामेल रहेको बताइन्छ।
२०७६ माघमा उमेश पटवालले राजीनामा दिएपछि नेपाली क्रिकेट टिमको मुख्य प्रशिक्षकको जिम्मेवारी जगत टमाटाले लिँदै आएका छन्। त्यसअघि पनि नेपालले एकदिवसीय अन्तर्राष्ट्रिय क्रिकेटको मान्यता पाउँदा मुख्य प्रशिक्षकमा टमाटा नै थिए। नेपालले मुख्य प्रशिक्षक नपाउँदासम्म टमाटाकै प्रशिक्षणमा खेलाडीले अभ्यास थाल्ने छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
