काठमाडौं- स्पेनिस क्लब बार्सिलोनाका फरवार्ड एन्टोनी ग्रिजम्यानले बार्सिलोनामा आफ्नो खेल राम्रो हुन नसकेको स्वीकार गर्दै डेढ वर्षको समयमा भिन्न तीन प्रशिक्षक र त्यसैअनुसार फेरिने फर्मेसनका कारण असहज भएको बताएका छन्।
बार्सिलोनामा राम्रो खेल देखाउन नसकेको आलोचना खेपिरहेका ग्रिजम्यानको पछिल्लो समय कप्तान लियोनल मेस्सीसँगको सम्बन्धका बारेमा पनि अनेक अडकलबाजी भइरहेका थिए। २०१९ को जुलाईमा एथ्लेटिको मड्रिडबाट १२० मिलियन युरोमा बार्सिलोना गएका ग्रिजम्यान पछिल्लो समय उठिरहेका सबै आरोप र प्रश्नहरुको जवाफमा बोलेका हुन्।
ग्रिजम्यान बार्सिलोना आएको अघिल्लो सिजन नै क्लबले उनलाई भित्र्याउन पहल गरेको थियो, जतिबेला ग्रिजम्यान बार्सिलोना अस्वीकार गरेका थिए। त्यही विषयले सुरुको समय लियोनल मेस्सी केही बेखुस रहेको ग्रिजम्यानले बताएका छन्।
आफू बार्सिलोना आएपछि सबैभन्दा पहिले मेस्सीसँग नै कुराकानी गरेको पनि ग्रिजम्यानले बताएका छन्। ‘म बार्सिलोना आएपछि सबैभन्दा पहिले मेस्सीसँग नै कुराकानी गरेको थिएँ। त्यसअघि मैले बार्सिलोना आउन अस्वीकार गर्दा मेस्सीलाई नराम्रो लागेको रहेछ, तर उनले मलाई सधैँ साथ रहेको बताएका थिए, त्यो साथ मैले हरेक समय पाएको महसुस गरिरहेको छु’ उनले जर्ज भाल्दानोको कार्यक्रम ‘युनिभर्सो भाल्दानो’मा भनेका छन्।
एथ्लेटिको मड्रिडमा डिएगो सिमोनेको प्रशिक्षणमा ग्रिजम्यानले जे गरिरहेका थिए त्यो बार्सिलोनामा गर्न नसकेको आलोचनालाई उनले स्वीकार गरेका छन्। ‘अहिले राम्रो गर्न नसकेको म स्वीकार गर्दछु, उत्कृष्ट ग्रिजम्यान मैदानमा देखिएको छैन। तर हरेक विषयमा आलोचना हुने पहिलो व्यक्ति म नै बनिरहेको छु’ उनले भने।
‘‘डेढ वर्षमा तीन प्रशिक्षकसँग काम भएको छ। त्यो सहज कुरा होइन। बार्सिलोनाको नयाँ अवस्था र खेल शैली बुझ्न मलाई समय लाग्यो। त्यसभन्दा पनि अझ फर्मेसन त परिवर्तन भइराख्यो। अहिले नयाँ अध्यक्षका लागि रहेका प्रत्याशीले समेत ग्रिजम्यान किन्नु ठीक कि बेठीक भनेर अहिले कुरा गरिरहेका छन्, त्यो अहिले गर्ने विषय हो जस्तो लाग्दैन।’’
ग्रिजम्यानका पूर्व एजेन्ट इरिक ओलहाट्स साथै उनका काका इमानुअल लोपेजले बार्सिलोनामा ग्रिजम्यानको खराब अवस्था मेस्सीका कारण भइरहेको भनेर दिएको अभिव्यक्तिमा पनि ग्रिजम्यान बोलेका छन्।
उनले भनेका छन्, ‘उनीहरुसँग अहिले मेरो कुनै सम्पर्क नै छैन, कुराकानी नभएको नै धेरै भइसकेको छ। मेरो बिहेको बेलामा इरिकलाई बोलाएको थिएँ, उनी आएका थिएनन्, यसैले कुराकानी नभएको धेरै भइसक्यो।’
‘‘मेरो काकालाई त फुटबलको बारेमा धेरै कुरा थाहा नै छैन। त्यस्तो मान्छेबाट पत्रकारले धारणा लिँदा यस्तो आइपर्छ। मैले मेस्सीलाई भनेको छु कि मैले उनीसँग कहिल्यै कुराकानी गरेको छैन। कतिसम्म भने काकाको फोन नम्बरसमेत मसँग छैन।’’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
