काठमाडौं–बैंक अफ काठमाण्डूका प्रमुख कार्यकारी अधिकृत शोभनदेव पन्तले एक वर्षको तलब सुविधाबापत २ करोड ८१ लाख तीन हजार ७९० रुपैयाँ बुझेका छन्। पन्तले गत आर्थिक वर्ष २०७६/७७ मा कर्मचारी सञ्चयकोष, औषधोपचार, सवारी साधन सुविधा, मोबाइल फोनको भुक्तानी सुविधा तथा बोनस ऐन बमोजिमको बोनससहित उक्त रकम बुझेका हुन्।
अघिल्लो वर्ष पन्तले यही सुविधाबापत २ करोड ३२ लाख रुपैयाँ बुझेका थिए।
बैंकका अन्य पदाधिकारीहरुले तलब भत्ताबापत एक करोड ४९ लाख रुपैयाँ बुझेका छन्। यो तलब सुविधा ७ उच्च पदाधिकारीहरुको हो।
बैंकका शेयरधनीले भने गत वर्षको मुनाफाबाट एक १ अर्ब ११ करोड रुपैयाँ बोनस शेयर र २५ करोड रुपैयाँ नगद लाभांस प्राप्त गर्ने छन्। लेखापरीक्षण प्रतिवेदनअनुसार करपछिको मुनाफा एक अर्ब ४६ करोड रुपैयाँ आर्जन गरेको थियो।
बैंकको कुल कर्मचारी खर्च एक अर्ब ११ करोड रुपैयाँ रहेको छ। यसमा कर्मचारीले प्राप्त गर्ने बोनस रकमलाई पनि समावेश गरिएको छ। बैंकले मंसिर १५ गते २६ औ वार्षिक साधारणसभा डाकेको छ। साधारणसभाबाट सञ्चालक समितिले प्रस्ताव गरेको लाभांस पारित भएपछि शेयर धनीले प्राप्त गर्ने छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
