काठमाडौं– विद्यार्थी अपहरण गरी हत्या गर्ने एक व्यक्ति ८ वर्षपछि पक्राउ परेका छन् । महोत्तरीको सोनमा गाउँपालिका–८ का २२ वर्षीय पंकज यादवको हत्यामा संलग्न भई फरार भएका महोत्तरीको एकडारा गाउँपालिका–३ का जिवछ अन्सारी पक्राउ परेका हुन्।
घटना २०६९ साल चैत ४ गतेको हो। पंकज जनकपुरको पिडारी चोकमा डेरा गरी कक्षा १२ मा अध्ययन गर्दै थिए। सिरहाको गणेशकुमार महतो, धनुषाका कुशेश्वर ठाकुर, बिक्रु भन्ने कृष्णा कुमार पूर्वे, राजु सिंह, श्याम मिश्र मिलेर पंकजको अपहरण योजना बनाएका थिए।
हाल पक्राउ परेका अन्सारीको जलेश्वरस्थित घरमा बसेर पंकजको अपहरण गरी फिरौती लिने र त्यसपछि हत्या गर्ने योजना बनेको थियो। सोही योजना अनुसार पंकजलाई जलेश्वर घुम्न जाउँ भनि मोटरसाइकलमार्फत् रामानन्दन विशेश्वर महेन्द्र क्याम्पसको चौरमा ल्याइएको थियो। त्यसपछि जिवछलाई उक्त घटनाको जानकारी गराइएको थियो।
त्यसपछि सबैजना मिलेर पंकजलाई लागुऔषध खुवाएर बेहास बनाएका थिए। अर्धचेत अवस्थामा रहेका पंकजलाई महोत्तरीको साविक अंकार गाविस–४ सिथ्त रातु खोलाको बगरमा लगेर मुखुमा पट्टी लगाएर सारीले घाँटी कसियो । जिवछले ल्याएको छुरीले पंकजको घाँटी रेटी हत्या गरिएको थियो ।
उनै जिवछले ल्याएको कोदालोले खाल्डो खनेर रातु खोलाको बगरमै पंकजको शव पुरिएको प्रहरी अनुसन्धानबाट खुलेको थियो । अपहरण र हत्यामा संलग्न जिवछलाई जिल्ला अदालत महोत्तरीले २०७२ जेठ १८ गते अपहरण तथा शरीर बन्धकको मुद्दामा १७ वर्ष कैद र २ लाख ७५ हजार रुपैयाँ जरिवाना तोकेको थियो।
तर जिवछ अन्सारी भने घटना भएदेखि नै फरार भएका थिए । फरार जिवछलाई नेपाल भारतको सीमा क्षेत्र भिठामोडबाट जिल्ला प्रहरी कार्यालय महोत्तरीको टोलीले बुधबार पक्राउ गरेको हो ।
पक्राउ परेका जिवछसहितको समूहले मृतक पंकज यादवको बुबा श्याम राय यादवसँग छोराको अपहरण गरेको भन्दै फिरौती वापतको रकमसमेत लिएको पाइएको थियो । २०६९ चैत १० सिरहा लक्ष्मीपुरस्थित कमला नहरमा बोलाई जिवछको समूहले ७ लाख रुपैयाँ फिरौती लिएको थियो।
अहिले पक्राउ परेका अन्सारीको ज्यानसम्वन्धी अभियोग मुल्तवीमा रहेकोले थप कानुनी प्रकृया अघि बढाइने जिल्ला प्रहरी कार्यालय महोत्तरीले जनाएको छ।
अन्सारीले झुठ्ठा बिवरण पेश गरी २०५१ सालमा नेपाली नागरीकता लिएको समेत भन्ने उजुरी परेको थियो । उक्त मुद्दाको समेत अब अनुसन्धान हुने प्रहरीले जनाएको छ।
उक्त घटनामा संलग्न प्रतिवादीहरु विक्रु भन्ने कृष्णा पुर्वेलाई कर्तब्य ज्यान मुद्दामा सर्वस्वसहित जन्मकैद, अपहरण तथा शरीर वन्धक लिने मुद्दामा १७ वर्ष कैद र २ लाख ७५ हजार जरिवाना तोकिएको थियो । हाल उनी कारागार कार्यालय झुम्का सुनसरीमा कैद भुक्तान गरिहरेका छन् ।
अर्का प्रतिवादी कुशेश्वर ठाकुरको हकमा कर्तव्य ज्यान मुद्दामा १२ वर्ष कैद सजाय, अपहरण तथा शरीर वन्धक लिने मुद्दामा १२ वर्ष कैद र २ लाख ३८ हजार २८५ रुपैयाँ जरिवना सुनाइएकोमा हाल उनी कारागार कार्यालय भीमफेदी मकवानपुरमा कैद भुक्तान गरिरहेका छन् ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
