काठमाडौं- स्पेनिस क्लब रियल मड्रिडका कप्तान सर्जियो रामोसले महत्वपूर्ण तीन खेल गुमाउने भएका छन्। दाहिने तिघ्रामा लागेको चोटका कारण उनले ला लिगामा भिलारियल र अलाभेस साथै च्याम्पियन्स लिगमा इन्टर मिलानसँगको खेल गुमाउने भएका हुन्।
रियल मड्रिडले भिलारियलसँग शनिबार राति ९ बजे खेल्दैछ भने आउने बिहीबार च्याम्पियन्स लिग अन्तर्गत समूह चरणको खेलमा इन्टर मिलानसँग खेल्दैछ। त्यसको तीन दिन पछि नै ला लिगामा अलाभेससँग खेल रहेको छ। डिफेन्डर रामोसले डिसेम्बर १ मा हुने च्याम्पियन्स लिग अन्तर्गत शख्तर डोनेस्कसँगको खेल भने खेल्न सक्ने अनुमान गरिएको छ।
युइएफए नेसन्स लिग अन्तर्गत स्पेनले जर्मनीलाई ६–० ले हराएको खेलमा रामोस चोटका कारण बाहिरिएका थिए। ४० औँ मिनेटमा रामोस बाहिरिएपछि पनि स्पेनले जर्मनीलाई दोस्रो हाफमा थप तीन गोल हानेको थियो। तर रियल मड्रिड टिममा भने रामोसबिनाको पछिल्ला अवस्था सहज छैन।
च्याम्पियन्स लिगमा त रामोस बिना रियल मड्रिडले खेलेका पछिल्ला आठ खेलमा सात खेल गुमाएको छ। जसमा २०१८–१९ को च्याम्पियन्स लिगमा आयाक्ससँग ४–१, गएको सिजन म्यानचेस्टर सिटीसँगको २–१ को हार र यसै सिजन शख्तर डोनेस्कसँगको ३–२ को हारसमेत रहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
