काठमाडौं- महाधिवेशन फागुनमा नहुने टुंगोमा पुगे पनि नयाँ मिति तोक्ने विषयमा कांग्रेसभित्र विवाद देखिएको छ। संस्थापन पक्ष र नेता कृष्णप्रसाद सिटौला फागुनमा महाधिवेशन हुन नसक्नेमा निचोडमा पुगेका छन्। वरिष्ठ नेता रामचन्द्र पौडेल पक्षले कार्यतालिका कार्यान्वयनमै समस्या रहेको बताउँदै आएको छ। फागुन ७ देखि १० सम्म कांग्रेसको १४औं महाधिवेशन मिति निर्धारण गरिएको थियो।
महाधिवेशनका लागि प्रारम्भिक कार्य संगठन समायोजन हालसम्म सकिएको छैन। बारा,सप्तरी र सिन्धुपाल्चोकको संगठन समायोजन सकिएको छैन। बारा र सप्तरीले नामावली पठाएको निर्वाचन समितिका सदस्य गोपालकृष्ण घिमिरेले जानकारी दिए।
सिन्धुपाल्चोकको संगठन समायोजन सक्न निर्वाचन समितिलाई हम्मेहम्मे परेको छ। केन्द्रीय सदस्य मोहन बस्नेत र जिल्ला सभापति विकास लामाको विवादले समायोजन टुंगिन सकेको छैन। बस्नेत संस्थापन र लामा इतरपक्षका भएकै कारण विवाद बढेको बताइएको छ। जिल्लाबाट लामाले पठाएको नाममा बस्नेतले आपत्ति जनाएपछि समायोजनको कार्य अड्किएको हो।
निर्वाचन समितिले समायोजनको कार्य एक साता भित्रमै सक्ने घिमिरेले बताए। साउन १० गतेसम्मका लागि अन्तिम समयावधि दिइएको समितिले समायोजनको कार्यलाई पूर्णता दिन सकेको छैन।
कार्तिक २८ मा बसेको केन्द्रीय समिति बैठकमा नयाँ कार्यतालिकाका सन्दर्भमा छलफल भएपनि निर्णय भने गरिएन। पौडेल नयाँ कार्यतालिका सार्वजनिक गर्ने पक्षमा नदेखिएपछि क्रियाशील सदस्यता नवीकरण र वितरणको टुंगो लगाउने निर्णय गरिएको सहमहामन्त्री डा प्रकाशशरण महतले बताए।
‘उहाँहरु (पौडेल पक्ष)ले क्रियाशील सदस्यताको नवीकरण र वितरणको कार्यतालिका मात्रै तोक्यौं भन्नुभयो,’ नेता महतले भने, ‘फागुनमा हुने गरि तोकिएको मितिलाई अहिले नचलाऔं भनेकाले अरु निर्णय भएन।’
महाधिवेशन फागुनमा हुन नसक्ने पौडेल पक्षलाई अवगत भएपनि क्रियाशील सदस्यताको मुद्दामा मात्रै उक्त पक्षले उठाएको महतले बताए।
भदौ मसान्तसम्म क्रियाशील सदस्यता वितरण/नवीकरणको कार्यतालिका बनाइएपनि कार्यान्वयन हुन सकेको थिएन। कार्यतालिका प्रभावित बन्नुमा कोरोना र पार्टी भित्रको विवाद कारण बनेका थिए। भदौ मसान्तसम्म कुनै पनि जिल्लाले क्रियाशील सदस्यता वितरण र नवीकरणको कार्य सम्पन्न गर्न सकेका थिएनन्। निर्धारित कार्यतालिका प्रभावित बनेपछि २८ कार्तिकको बैठकले मंसिर मसान्तसम्म नवीकरणको सूची तयार गर्ने निर्णय गरेको छ। मंसिर महिना भित्र क्रियाशील सदस्यता वितरण र नवीकरण अनिवार्य सकेर सूची केन्द्रलाई पठाउन मातहतका कार्यसमितिलाई निर्देशन दिइएको छ।
क्रियाशील सदस्यता टुंगाउने गरी तोकिएको कार्यतालिका प्रति सिटौल पक्ष असन्तुष्ट बनेको छ। महाधिवेशन सर्ने निश्चित भइसकेकाले नयाँ मिति सहितको पूर्ण कार्यतालिका ल्याउनुपर्ने सिटौलाको जोड छ।
‘फागुनमा महाधिवेशन हुन सक्ने अवस्था देख्दिनँ। महाधिवेशनको मिति नतोकेपछि अन्योल पनि भयो। शंका उपशंका बढ्छ,’ नेता सिटौलाले भने, ‘बैसाखको अन्तिम वा जेठमा तोकौं भनी मैले आफ्नो कुरा राखें। उहाँहरु (सभापति र पौडेल पक्ष) ले मान्नुभएन।’
दुवै पक्षले फागुनमा महाधिवेशन हुनसक्ने दाबी गरेको सिटौलाले बताए। सिटौलाको बोलीको खण्डन गर्दै संस्थापन पक्षका नेता महतले फागुनमा महाधिवेशन हुन नसक्नेमा ढुक्क रहेको बताए।
महाधिवेशन फागुनमै ‘गर्न सकिने र फागुनमा गर्नै सकिन्न’ भनि नेताहरु विभाजित भएका छन्। संस्थापन पक्षले महाधिवेशनको मिति पटक पटक सार्नुभन्दा अन्तिम समय भदौलाई तोक्ने पक्षमा छ। पौडेल पक्ष हाल तोकिएकै मितिमा महाधिवेशन हुने गरि कार्यतालिका परिमार्जन हुनुपर्ने अडानमा छ। पौडेल निकट नेता नवीन्द्रराज जोशीले तोकिएको कार्यतालिका अनुसार कार्य नभए महाधिवेशन सारेपनि हुन नसक्ने बताए। उनले भने, ‘कार्यतालिका परिवर्तन गरिरहने,काम नगर्ने गरेर हुन्छ र? काम गर्दागर्दै समय नपुगेर सार्नु भिन्नै कुरा हो।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
