काठमाडौं- सत्तारुढ नेपाल कम्युनिस्ट पार्टी (नेकपा) का सचिवालय सदस्य ईश्वर पोखरेलले प्रचण्डलाई बुँदाबुँदामा जवाफ दिने बताएका छन्। बुधबार बालुवाटारमा सम्पन्न सचिवालय बैठकमा उनले प्रचण्डप्रति कटाक्ष गरेका हुन्।
‘समयक्रममा तपाईंले बुँदाबुँदामा जवाफ पाउनुहुनेछ,' पोखरेललाई उद्धृत गर्दै एक सचिवालय सदस्यले भने।
पोखरेलले यसअघि नै सार्वजनिक रुपमै प्रस्तावको आलोचना गरिसकेका छन्। गत शनिबार उनले फेसबुकमा स्टाटस लेख्दै उनले प्रचरण्डको प्रस्ताव स्थायी कमिटीको सर्वसम्मत निर्णय विरूद्ध र पार्टी एकताको भावना विरूद्ध भएको बताएका थिए। ‘सहमतिका साथ अघि बढ्नुपर्ने पार्टी एकता गर्दा स्वीकार गरिएका आधार र मान्यता विपरित ‘कि तँ छैनस् कि म छैन’ भन्ने अत्यन्त असन्तुलित र दुराग्रहपूर्ण ढंगले अघि सारिएका छन् ती, ‘प्रस्तावहरू’ ! दुराग्रहका साथ प्रस्तुत ती ‘प्रस्तावहरू’ फिर्ता लिएर एकता प्रक्रियालाई निष्कर्षमा पुर्याउन अघि बढ्ने कि दुर्भाग्य निम्त्याउने?’, उनको प्रश्न थियो।
गत कात्तिक २८ गते बसेको सचिवाय बैठकमा प्रचण्डले पेश गरेको १९ पृष्ठको प्रस्तावमा ओलीको प्रशस्तै आलोचना गरिएको छ। त्यसले ओली र उनी पक्षका नेताहरुलाई चिढ्याएको छ। जसले गर्दा उनीहरु प्रचण्डले प्रस्ताव लिनुपर्ने पक्षमा थिए।
त्यस्तै, महासचिव विष्णु पौडेलले सचिवालयका सदस्यहरुको सामूहिक राजीनामाको प्रस्ताव गरेका छन्। ‘हामी सबै असफल भयौं। हामीले पार्टी र आन्दोलनलाई कहीँ पुर्याउँदैनौं’, उनले प्रस्ताव उद्धृत गर्दै एक सचिवालय सदस्यले भने, ‘त्यसैले हामी सबैले सामूहिक राजीनामा दिऔं।’
उनले पार्टीको जिम्मेवारी नयाँ पुस्तालाई दिन र सचिवालयमा पनि नयाँ पुस्ता ल्याउन प्रस्ताव गरेका थिए।
सामान्यतया नरम र समन्वयकारी सुनिने पौडेल आजको बैठकमा भने आक्रोशित सुनिएका थिए।
नेकपाको सचिवालय बैठक १३ गतेसम्मलाई स्थगित भएको छ। सो बैठकमा ओलीले छुट्टै प्रस्ताव ल्याउने प्रवक्ता नारायणकाजी श्रेष्ठले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787723619.jpg)
-1786602170.png)
-1789631269.jpg)
