फाइल तस्बिर
काठमाडौं- प्रधानमन्त्री एवं नेकपा अध्यक्ष केपी शर्मा ओलीले पार्टीका नेता वामदेव गौतमसँग भेटघाट गरी सहयोग गर्न प्रस्ताव गरेका छन्। आइतबार बिहान प्रधानमन्त्री निवास बालुवाटारमा गौतमलाई बोलाएर पार्टीमा पछिल्लो पटक देखिएको विवादका विषयमा छलफल गर्दै आफू अप्ठेरो अवस्थामा पुगेकाले सहयोग गर्न प्रधानमन्त्रीले प्रस्ताव गरेको गौतमको सचिवालयले जानकारी दिएको छ।
नेता गौतमले भने त्यसबारे प्रधानमन्त्री ओलीबाट नै नेताहरूप्रति अपमानजनक व्यवहार भएकाले पार्टीमा वैमनश्यताको बीजारोपण भएको भन्दै त्यस्ता कदम सच्याउन आवश्यक रहेको बताएका थिए। प्रधानमन्त्री ओलीले गौतमसँग घण्टाभन्दा बढी समय छलफल गरेका थिए। छलफलमा महासचिव विष्णु पौडेल पनि सहभागी थिए।
अहिलेको अवस्थामा कसरी अघि बढ्न सकिन्छ भनेर प्रधानमन्त्री ओलीले गौतमसँग सुझाव समेत मागेका थिए। उपाध्यक्ष गौतमले पार्टीका बैठकमा छलफल गर्नुपर्ने सुझाव दिएको गौतमका प्रेस सहयोगी विश्वमणि सुवेदीले बताए। प्रधानमन्त्रीले 'सहयाेग गर्नुस्' भनेर प्रस्ताव राखेपछि गाैतमले ओलीलाई पहिले 'तपाईं सच्चिन जरुरी छ' भनेर जवाफ दिएका थिए।
प्रचण्डले राखेकाे राजनितिक प्रतिवेदन फिर्ता हुनुपर्ने अनि छलफल सहजता हुने ओलीको भनाइ रहेको गौतमको भनाइ थियो।
'तपाईं सच्चिएपछि प्रचण्डले राखेको प्रतिवेदन फिर्ता लिनै पर्दैन। त्यो प्रतिवेदन आफै गौण हुन्छ,' प्रधानमन्त्रीलाई गौतमले दिएको प्रत्युत्तर उद्धृत गर्दै सुवेदीले नेपाल लाइभसँग भने, 'सबै विषय सचिवालय बैठकमा छलफल गर्न सकिन्छ। त्यहीबाट समाधान सजिलो हुन्छ।,'
यसअघि शनिबार साँझ मात्र प्रधानमन्त्री ओली राष्ट्रपति विद्यादेवी भण्डारीसँगको भेटका लागि पुगेका थिए। शनिबार दिउँसो ४ बजेतिर शितल निवास प्रवेश गरेका प्रधानमन्त्री ओलीले राष्ट्रपति भण्डारीसँग २ घण्टाभन्दा लामो छलफल गरेका थिए।
प्रधानमन्त्री ओलीसहित उनी निकट थप नेताहरुसमेत राष्ट्रपतिसँगको भेटका लागि पुगेका थिए। प्रधानमन्त्रीले पछिल्लो पटक देखिएको विवादका विषयमा कुराकानी गरेको स्रोतको दाबी छ।
राष्ट्रपतिले लगातार प्रधानमन्त्री ओलीलगायतका नेकपा नेताहरू भेटेर पार्टीमा हस्तक्षेप बढाएको भन्दै नेकपाकै केही नेताहरूले आलोचना गर्दै आएका छन्। पार्टीमा अप्ठेरो पर्नेबितिकै प्रधानमन्त्री ओली भने राष्ट्रपतिसँग छलफल गर्ने गरेका छन्। यसअघि पनि पार्टीमा विवाद हुँदा प्रचण्ड र ओलीले राष्ट्रपतिलाई साक्षी राखेर सहमति गरेका थिए।
प्रधानमन्त्री ओलीको इच्छाविपरीत शुक्रबार बसेको सचिवालय कमिटीको बैठकपछि अध्यक्षद्वयबीच भएका पत्र आदानप्रदानका शृंखला सार्वजनिक भएका थिए। सचिवालय बैठकमा यसअघि एकै प्रतिवेदन पेस गर्दै आएको भएपनि पार्टीका कार्यकारी अध्यक्ष पुष्पकमल दाहाल प्रचण्डले समेत छुट्टै प्रतिवेदन पेस गरेका थिए।
पार्टीमा गुटबन्दी गरेको, सरकार संचालनका प्रक्रियामा पार्टीसँग कुनै परामर्श नगरेको, भ्रष्टाचारीलाई संरक्षण गरेकोलगायतका आरोप प्रधानमन्त्री ओलीमाथि लगाउँदै प्रचण्डले १९ पाने राजनीतिक प्रतिवदेन पेस गरेका थिए।
यसअघि पनि गत शुक्रबार प्रचण्डसहित ५ जना सचिवालय सदस्यले तिनै विषयको संकेत गर्दै तत्काल बैठक बोलाउन आग्रह गरेका थिए। त्यसपछि मंगलबार पाँचै जनालाई पत्र लेख्दै ओलीले आफूलाई पार्टी र सरकार संचालनमा सहयोग नगरेको आरोप लगाएका थिए। यसका साथै पार्टीको जिम्मेवारी पूरा नगरी गुटबन्दीमा लागेको समेत उनको आरोप थियो।
शनिबारको बैठकमा नेताहरूलाई तिनै पत्र आदानप्रदान मात्र गरिएको थियो। बैठक मंसिर ३ गते पुनः बस्ने गरी सकिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
