नुवाकोट- सम्झौताअनुसार पूर्वाधार विकास नगरी बन्चेरे डाँडामा काठमाडौं उपत्यकाको फोहर व्यवस्थापन गर्न लागिएको भन्दै प्रभावित क्षेत्रका युवाहरुले आन्दोलनको घोषणा गरेका छन्।
सरकारी पक्षले सम्झौता मात्रै गर्ने, तर कार्यान्वयन नगरेर स्थानीयको आँखामा छारो हाल्ने काम गरेको भन्दै प्रभावित क्षेत्रका विभिन्न युवा क्लवहरुले पहिला सम्झौता कार्यान्वयन गरेर मात्रै बन्चेरे डाँडामा फोहोर व्यवस्थापन गर्न माग गरेका छन्।
आन्दोलन घोषणा गर्नेमा ककनी गाउँपालिकाका क्लबहरु ककनी प्रगतिशील युवा क्लब, करुण युवा क्लब, रोयल युवा क्लब छन्। ककनी प्रगतिशीलका अध्यक्ष दिपेश ढुँगाना भन्छन्, सम्झौता किन कार्यान्वयन हुन नसकेको हो, त्यसको जवाफ दिनुपर्यो। समस्यालाई बेवास्ता गरी बन्चरे ल्याण्डफिल साइटमा फोहर फ्ल्याल्ने काम भए हामी रोक्छौं।’
विगत १६ वर्षदेखि सिस्डोलमा काठमाडौंको फोहोर व्यवस्थापन हुँदा यस क्षेत्रमा मानिसहरुको स्वास्थ्यमा परेको प्रतिकुल प्रभावलाई सरकारले बेवास्ता गर्ने र यस क्षेत्रको विकासका लागि पटक पटक सम्झौता भएर पनि काम नभएको क्लबहरुको गुनासो छ।
उनीहरुले प्रभावित क्षेत्रबाट नेतृत्व गर्नेहरुबाट धेरै पटक संघर्ष समिति बने पनि त्यस्ता समितिहरु राजनीतिक र आर्थिक स्वार्थको पछि लाग्ने गरेको बताएका छन्। यस क्षेत्रका वास्तविक पीडितहरुको पीडालाई सम्बोधन गर्ने काम यस्ता संघर्ष समितिबाट पटक्कै नभएको क्लबहरुले बताएका छन्।
आफूलाई जनप्रतिनिधि बताउने व्यक्ति तथा दलहरुबाट प्रभावित क्षेत्रका जनताको स्वास्थ्यमा परेको नकारात्मक असर र पूर्वाधार विकासलाई उपेक्षा गरिएकाले आफूहरु अघि सर्नुपरेको बताउँदै क्लवहरुले मानव र फोहोर एकै ठाउँमा बस्न नसक्ने तथ्यलाई सरकार, राजनीतिक दलका स्थानीयदेखि केन्द्रीय नेताहरुले मनन् नगर्नु गम्भीर विषय भएको बताएका छन्।
मानव स्वास्थ्यमा प्रतिकुल प्रभाव नपर्ने गरी फोहोरको वैज्ञानिक व्यवस्थापन गर्ने र ल्याण्डफिल साइटका प्रभावित जनताले स्वस्थ बाताबरणमा बाँच्न पाउने संवैधानिक अधिकारको सरकार, काठमाडौं महानगरपालिकासहित अन्य नगरपालिकाहरुले सुनिश्चितता नगर्दासम्म आफूहरुको आन्दोलन जारी रहने बताएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
