काठमाडौं- भारत सरकारले नेपाललाई २८ भेन्टिलेर सहयोग हस्तान्तरण गरेको छ। स्वास्थ्य तथा जनसंख्या मन्त्रालयमा एक कार्यक्रमका बीच भारतले २८ वटा भेन्टिलेटर सहयोग हस्तान्तरण गरेको हो।
आइतबार नेपालका लागि भारतीय राजदूत विनयमोहन क्वात्राले स्वास्थ्यमन्त्री भानुभक्त ढकाललाई भेन्टिलेटर हस्तान्तरण गरेका हुन्। भेन्टिलेटर हस्तान्तरणपछि राजदूत क्वात्राले कोभिड महामारीको समयमा दुवै देशलाई एक अर्काको आवश्यता रहेको बताएका थिए।
भारतीय सरकार र भारतीय जनताले नेपाललाई गर्ने सहयोग सकारात्मक सहकार्यको भावना भएको उनले बताए। कोभिड संक्रमण सुरु भएदेखि नै दुवै देशले एक अर्कोलाई सहयोग गर्दै आएको र भोलिका दिनमा पनि सहयोग जारी रहने उनले बताएका थिए।
स्वास्थ्यमन्त्री ढकालले आफू अफ्ठ्यारोमा भएपनि विगतदेखि नै सहयोग गर्दै आएकोमा धन्यवाद दिएका थिए। मन्त्री ढकालले सहयोग प्राप्त भेन्टिलेर उपयुक्त ठाउँमा पठाउने बताए। संक्रमण दर बढ्दो अवस्थामा रहेको उल्लेख गर्दै उनले बढी सक्रिय संक्रमित र गम्भीर खालका बिरामी भएको ठाउँमा भेन्टिलेटर पठाउने उनले जानकारी दिए।
नेपालमा हालसम्म ११०८ जना कोरोना संक्रमितको मृत्यु भएको मन्त्रालयको तथ्यांक छ। तर कोरोना संक्रमित मृतकको शव व्यवस्थापनको जिम्मा पाएको नेपाली सेनाले भने सो भन्दा करिब ६ सय बढी संक्रमित मृतकको शव व्यवस्थापन भएको जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
