काठमाडौं– इन्डियन प्रिमियर लिग (आइपिएल) क्रिकेटको दोस्रो क्वालिफायरमा आइतबार (आज) राति दिल्ली क्यापिटल्सले सनराइजर्स हैदरावादसँग प्रतिस्पर्धा गर्दैछ। फाइनलको सपना देखेको दिल्लीको लागि आज पनि हैदरावाद तगारो बन्न सक्छ।
दिल्ली असन्तुलित टिम हो। कुनै कुनै खेलमा फराकिलो जित निकाल्ने दिल्ली कुनै खेलमा भने नराम्ररी पराजित हुँदै आएको पनि छ।
कमजोर टिम नभएपनि दिल्लीका खेलाडीमा परिपक्वता देखिँदैन। पहिलो क्वालिफायरको खेलमा दिल्ली मुम्बई इन्डियन्ससँग ५७ रनले पराजित हुने क्रममा सुरुवातका तीन ब्याट्सम्यान शून्यमै पेविलियन फर्किए। निकै कमजोर ब्याटिङ देखियो।
मार्क्स स्टोइनिस र अक्षर पटेलले दिल्लीलाई सम्मानजनक स्कोरमा पुर्याए। नत्र दिल्लीको ब्याट्सम्यान निकै आलोचित हुने ठाउँ प्रशस्तै थियो। जारी आइपिएलमा दिल्लीले सबैभन्दा बढी र सबै भन्दा डर मानेर खेलेको टिम नै मुम्बई हो। मुम्बईसँग दिल्ली तीन खेलमा हार्न पुग्यो। लिग चरणको पहिलो खेलमा ५ विकेटले पराजित भएको दिल्ली दोस्रो खेलमा ९ विकेटले हारेको थियो।
मुम्बईपछि हैदरावादविरुद्ध दिल्ली कमजोर देखियो। लिग चरणका दुवै खेलमा दिल्ली हैदरावादसँग पराजित भएको छ। हैदरावादविरुद्ध पहिलो खेलमा १५ रनले हारेको दिल्ली दोस्रो खेलमा ८८ रनको फराकिलो हार ब्यहोर्न पुग्यो। लिग चरणको खेलमा लगातार दुई खेलमा हार ब्यहोरेको दिल्ली टिम तेस्रो पटक भने हारको बदला लिने लक्ष्यमा समेत हुनेछ। तर दिल्लीलाई सजिलो भने छैन। पछिल्लो खेलहरुमा दिल्लीको उच्च प्रदर्शन भइरहेको छैन।
ब्याट्सम्यान चेल्दा बलर चलेका छैनन् भने बलर चल्दा ब्याट्सम्यान सस्तैमा समेटिएका छन्। त्यसैले पनि दिल्ली सन्तुलित टिमको रुपमा देखा परेको छैन। दिल्ली जसरी हुन्छ हैदरावादलाई पराजित गर्दै आइपिएलकै इतिहासमा पहिलो पटक फाइनल पुग्न चाहन्छ। तर हैदरावाद बाधक हुन पनि सक्छ।
यसअघि २०१९ को आइपिएलमा दिल्ली प्लेअफको दोस्रो क्वालिफायरबाटै चेन्नाई सुपर किंग्ससँग ६ विकेटले पराजित हुँदै बाहिरिएको थियो। त्यही दिन आउने त होइन? दिल्ली टिमलाई डर पनि छ।
दिल्लीका मुख्य प्रशिक्षक रिक्की पोन्टिङलाई आइतबार (आज) को खेलमा सबैभन्दा दोधार पर्ने देखिन्छ। प्लेइङ इलाभेनमा बलर छनौटमा उनलाई सकस नपरेपनि ब्याट्सम्यान छनोटमा भने उनलाई अहिलेसम्मकै कठिन पर्ने देखिन्छ। पृथ्वी शो र शिखर धवनकै जोडीले ओपनिङ थाल्ने निश्चित छ। तर अजिंक्या राहानेको सम्भावना भने कम छ। उनी मुम्बईविरुद्ध शुन्यमै आउट भएका थिए।
उनको स्थानमा सिमरन हिटम्यरले खेल्ने सम्भावना छ। यस्तो भएमा ओपनिङमा धवन र पृथ्वी र तेस्रो नम्बरमा कप्तान श्रेयस ऐयर ब्याटिङ गर्न आउने छन्। रिषभ पन्त र मार्कस स्टोइनिस, सिमरन हिटम्यर र अक्षर पटेलले मध्यक्रम र फिनिसिङ लाइन सम्हाल्नेछ।
सिमरन टिममा आए भने बलिङतर्फ खेलाडी परिवर्तन हुनेछ। यस्तो भएमा ड्यानियल साम्स टिम बाहिर हुनेछन्। उनको बलिङ तारिफयोग्य पनि भइरहेको छैन। मुम्बईविरुद्ध उनले चार ओभरमा ४४ रन खर्चिएका थिए। रविचन्द्रन अश्विन र अक्षर पटेलले स्पिनरको भूमिका निभाउँदा तीब्र गतिको बलिङमा कागिसो रबाडा, एनरिच नोर्टजे दिल्लीको मुख्य हतियार हुन्।
हैदरावादविरुद्ध पनि सन्दीप लामिछाने खेल्ने सम्भावना लगभग छैन। लिग चरणकै खेलमा सन्दीपमाथि टिमले विश्वास गरेन क्वालिफायरको महत्वपूर्ण खेलमा त झनै विश्वास गर्छ भन्ने ठाउँ छैन।
हैदरावाद पछिल्लो खेलमा निकै शक्तिशाली देखिएको छ। उसले पछिल्लो चार खेलमा जित हात पारेको छ। प्लेअफकै इलिमिनेटरमा पनि रोयल च्यालेन्जर्स बैंग्लोरलाई पराजित गर्दै दोस्रो क्वालिफायरमा पुगेको टिम हो, हैदरवाद। बैंग्लोरलाई ६ विकेटले पराजित गरेको थियो।
डेविड वार्नर, केन विलियम्सन, मनिष पाण्डे, जासन होल्डरजस्ता ब्याट्सम्यान चलेमा दिल्ली धरापमा पर्न सक्छ। हैदरावादको बलिङ पनि उतिकै राम्रो छ। राशिद खान, सन्दीप शर्मा, जासन होल्डर, नटराजन, शाहबाज नदिम लगायत बलर छन्।
दिल्ली र हैदरावादबीचको विजेता टिमले फाइनलमा उपाधिका लागि मुम्बईसँग प्रतिस्पर्धा गर्नेछ। फाइनल खेल मंगलबार राति हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1775455666-1775459306.jpeg)
-1764146706.png)
