काठमाडौं- कोरोना संक्रमित मृतकको तथ्याकंबारे सरकारी निकायहरूकै तथ्यांक बाझिएको छ। स्वास्थ्य तथा जनसंख्या मन्त्रालयका अनुसार बुधबार दिउँसो ४ बजेसम्म १ हजार ३४ जना कोरोना संक्रमितको मृत्यु भएको छ।
तर कोरोना संक्रमित मृतकको शव व्यवस्थापनको जिम्मा पाएको नेपाली सेनाका अनुसार १ हजार ४ सयभन्दा बढीको मृत्यु भइसकेको छ। यस्तै प्रदेश स्तरका सामाजिक विकास मन्त्रालयहरूका अनुसार सातै प्रदेशमा गरी १ हजार १ सय जनाभन्दा बढीको मृत्यु भएको छ।
यसरी कोरोना संक्रमित मृतकको संख्याका विषयमा सरकारी निकायहरूकै तथ्यांक बाझिएपछि अन्यौल सिर्जना भएको छ। मृत्यु भएका कोरोना संक्रमितको तथ्यांक फरक परेपछि एकिन संख्या निर्धारण गर्न स्वास्थ्य तथा जनसंख्या मन्त्रालय अध्ययन गर्न समिति नै गठन गरेको छ।
मन्त्रालयको अध्ययन समितिले नेपाली सेना र प्रदेशका सामाजिक विकास मन्त्रालय र संघीय सरकारको स्वास्थ्य तथा जनसंख्या मन्त्रालयका अनुसार संक्रमित मृतकको तथ्यांकहरूको अध्ययन गरी यकिन संख्या तय गर्ने बताइएको छ।
स्वास्थ्य मन्त्रालयका सहसचिव शैलजा रेग्मीको संयोजकत्वमा इपिडिमियोलोजी तथा रोग नियन्त्रण महाशाखाका निर्देशक डा वासुदेव पाण्डे र सिसिएमसीका प्रतिनिधि डा अरुण न्यौपाने सदस्य रहेको समिति गठन भएको हो।
उक्त समितिले कात्तिक १५ गतेसम्म प्रतिवेदन बुझाउने गरी समय दिएको थियो। तर, काम नसकिएपछि अझै केही समय लाग्ने बताइएको छ।
स्वास्थ्य मन्त्रालय, नेपाली सेना र प्रदेशहरुको कोरोना संक्रमितको मृत्युको तथ्यांकमा एकरुपता नभएपछि मन्त्रालयले त्यसबारे छानबिन गरी प्रतिवेदन बुझाउन समितिलाई निर्देशन दिएको छ।
स्वास्थ्य मन्त्रालयकी सहसचिव एवं समितिकी संयोजक शैलजा रेग्मीले अहिले दुवैतिरको तथ्यांक अध्ययन भइरहेकोले दुई-तीन दिनमा प्रतिवेदन बुझाउने जानकारी दिइन्।
‘हामीले मन्त्रालय र सेनाको तथ्यांक जुधाएर अध्ययन गर्दैछौँ। इडिसिडीमा होम आइसोलसनमा रहँदा मृत्यु भएका संक्रमितको संख्या नहुने भएकाले केही तलमाथि भएको हो कि भन्ने प्रारम्भिक कारण देखिएको छ,' उनले भने, 'तर अझै हामीलाई अन्तिम निष्कर्ष दिनका लागि केही दिन लाग्छ।’
स्वास्थ्य मन्त्रालयका प्रमुख विशेषज्ञ तथा स्वास्थ्य मन्त्रालयका कोभिड फोकल पर्सन महेन्द्रप्रसाद श्रेष्ठले समितिले मृत्यु तथ्यांकमा कहाँ फरक परेको हो, यथार्थ के हो भन्ने विषयमा छानबिन गरी चाँडै प्रतिवेदन बुझाउने जानकारी दिए।
प्रदेशका सामाजिक विकास मन्त्रालयहरुले भने कोभिड व्यवस्थापन र तथ्यांक राख्ने सन्दर्भमा संवेदनशील रुपमा काम नगरेको स्वास्थ्य मन्त्रालयको बुझाइ छ।
‘नेपाली सेनाको तथ्यांक मन्त्रालयको भन्दा फरक छ। मन्त्रालयमा अस्पताल र स्वास्थ्य संस्थाबाट रिपोर्ट भएको तथ्यांक मात्र आउँछ। सेनाले पनि कोरोना भएको रिपोर्ट, वडाको सिफारिसबिना शव व्यवस्थापन गर्दैन,' उनले भने, 'त्यसैले धेरै हदसम्म सेनाको रिपोर्ट साँचो नै हो। यसमा कहाँ फरक परेको भन्ने समितिले औँल्याउने छ।’
उनका अनुसार कतिपय संख्या भने सेनामा भएको मन्त्रालयको रेकर्डमा छैन भने मन्त्रालयमा गणना भएको सेनाको रेर्कडमा देखिएको छैन। समितिले प्रतिवदेन बुझाएपछि भने यकिन भएको तथ्यांक अपडेट हुने श्रेष्ठले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
