काठमाडौं- नेकपा अध्यक्ष एवम् प्रधानमन्त्री केपी शर्मा ओलीका दूत दैनिकजसो अर्का अध्यक्ष पुष्पकमल दाहाल‘प्रचण्ड’लाई भेट्न खुमलटार पुग्ने गरेका छन्। पार्टीका दुई अध्यक्षबीच संवादहीनताको अवस्थापछि ओलीको सन्देश लिएर दैनिक जसो खुमलटार धाउने गरेका हुन्।
पार्टीमा दुई अध्यक्षबीच विवाद उत्कर्षमा पुगेपछि संवादको पहल गर्न ओली निकट नेताहरु खुमलटार आइपुग्ने गरेको प्रचण्डको सचिवालयले जानकारी दिएको छ।
गत कात्तिक ४ गते बालुवाटारमा दुई अध्यक्ष ओली र प्रचण्डबीच संवाद भएपछि उनीहरूबीच पुनः भेटघाट भएको छैन। यसपछि ओली निकट नेताहरु प्रचण्डलाई वार्ताका लागि आग्रह गर्दै खुमलटार पुग्ने गरेका हुन्।
प्रचण्ड ओलीलाई भेट्न बालुवाटार जान छोडेपछि यतिबेला दैनिकजसो ओलीका दूत खुमलटार पुग्ने गरेका छन्। बुधबार बिहान अध्यक्ष प्रचण्डलाई भेट्न अर्थमन्त्रीसमेत रहेका महासचिव विष्णु पौडेल पुगेका थिए भने दिउँसो स्थायी कमिटी सदस्य सुवासचन्द्र नेम्वाङ पुगेका थिए।
ओलीको सन्देश लिएर गएका नेताहरुले पार्टीभित्रको विवाद समाधान गर्न दुई अध्यक्ष संवादमा बस्नुपर्ने आग्रह गर्दै आएका छन्। पौडेल र नेम्वाङ पुगेको भोलिपल्ट बिहीबार लुम्बिनी प्रदेशका मुख्यमन्त्री शंकर पोखरेल ओलीको सन्देश बोकेर खुमलटार पुगेका थिए।
शुक्रबार बिहान साढे ८ बजे दुई अध्यक्ष संवादमा बस्नुपर्ने भन्दै स्थायी कमिटी सदस्य एवम् परराष्ट्रमन्त्री प्रदीपकुमार ज्ञवाली खुमलटार पुगेको प्रचण्डका प्रेस संयोजक विष्णु सापकोटाले बताए। छलफलमा ज्ञवालीले दुई अध्यक्ष संवादमा बसेर निकास दिनुपर्ने बताएका थिए।
पार्टीमा एकपछि अर्को सम्झौता गर्ने प्रधानमन्त्रीले उल्लंघन गर्दै जान थालेपछि प्रचण्ड ओलीप्रति विश्वस्त देखिँदैनन्। ‘पार्टीलाई एकताबद्ध बनाउन प्रधानमन्त्रीसँग एकपछि अर्को सम्झौता गर्दैछौं,’ प्रचण्डसँगको भेटपछि एक स्थायी कमिटी सदस्यले भने, ‘तर, प्रधानमन्त्रीजी सम्झौता गरेको भोलिपल्टदेखि उल्लघंन गर्दै जानुहुन्छ। अब फेरि भेटेर छलफल गर्नुको अर्थ छैन।’
पार्टी कमिर्टीले गरेका निर्णय प्रधानमन्त्रीले मान्छु भन्दै सहमति गरेपनि एकपछि अर्को गर्दै सहमति लत्याउन थालेपछि प्रचण्ड निक्कै चिढिएका हुन्।
ओलीलाईं अप्ठ्यारो परेपछि निकटका नेता काठमाडौंमा
दुई अध्यक्षबीच संवादहीनताको अवस्थापछि ओली निकट नेताहरु सबै काठमाडौमा केन्द्रित भएका छन्। ओली सरकारमा अप्ठ्यारोमा परेपछि लुम्बिनी प्रदेशका मुख्यमन्त्री शंकर पोखरेल, गण्डकी प्रदेशका मुख्यमन्त्री पृथ्वीसुब्बा गुरुङलगायत नेताहरु काठमाडौंमा केन्द्रित भएका हुन्।
सरकारविरुद्ध प्रचण्डसहित वरिष्ठ नेता माधवकुमार नेपालले अविश्वास प्रस्ताव ल्याउने भयले उनीहरुलाई सताएको चर्चा हुन थालेको छ। ओली निकट नेताहरु उपप्रधानमन्त्री ईश्वर पोखरेल, महासचिव विष्णु पौडेल, स्थायी कमिटी सदस्य एवम् लुम्बिनी प्रदेशका मुख्यमन्त्री शंकर पोखरेल, गण्डकी प्रदेशका मुख्यमन्त्री पृथ्वीसुब्बा गुरुङ र स्थायी कमिटी सदस्य सुवासचन्द्र नेम्वाङ नियमित छलफलमा जुट्न थालेका छन्।
पार्टीभित्रको विवाद सल्टाएर मात्रै मुख्यमन्त्रीहरू पोखरेल र गुरुङ आ–आफ्नो कार्यक्षेत्र फर्किने तयारीमा छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790071578.png)
-1786602170.png)
-1789631269.jpg)
