खोटाङ- दसैंको बिदा सकिएलगत्तै सरकारी कार्यालयहरुका सेवा सुचारू भए पनि खोटाङका जिल्ला प्रशासन कार्यालय,पालिका तथा वडा कार्यालयका ताला भने खुलेका छैनन्।
खोटाङ जिल्ला समन्वय समिति प्रमुख, प्रमुख जिल्ला अधिकारी र डीएसपीलाई कोरोना संक्रमण पुष्टि भएसँगै अत्यावश्यक बाहेकका प्रशासनिक क्रियाकलाप ठप्प भएको हो।
अर्को सूचना जारी नहुँदासम्मका लागि जिल्ला प्रशासन कार्यालय खोटाङ सिल गरिएको र सबै पालिकाहरुबाट प्रवाह हुने सेवासमेत स्थगन गर्न परिपत्र गरिएको सहायक प्रमुख जिल्ला अधिकारी विकल श्रेष्ठले जानकारी दिए।
कार्यलयका अन्य कर्मचारीहरूको पिसिआर रिपोर्ट आउन बाँकी रहेकाले कार्यालय कहिलेसम्म सिल रहन्छ भनेर किटान गर्न सक्ने अबस्था नरहेको सहायक प्रमुख जिल्ला अधिकारी श्रेष्ठले नेपाल लाइभलाई बताए।
रावा बेसी गाउँपालिका वडा नम्बर चार डुम्रेधारापानीका अध्यक्ष ज्ञानुराज पाण्डेले जिल्ला प्रशासन कार्यालयबाट अर्को सूचना नभएसम्मका लागि कार्यालय बन्द हुने बताए।
समन्वय प्रमुख बबी चाम्लिङ, प्रमुख जिल्ला अधिकारी शालिग्राम शर्मा पौडेल र प्रहरी नायब उपरीक्षक नारायणप्रसाद चिमरीयाको आइतबार प्रदेश १ को जनस्वास्थ्य प्रयोगशालामा गरिएको परीक्षणमा कोभिड-१९ पोजिटिभ देखिएको थियो ।
उनीहरू सबैको अवस्था सामान्य रहेको बताइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1762320424.png)
