काठमाडौं–नेपाल कम्युनिष्ट पार्टी (नेकपा) मा फेरि विवाद चर्किएको छ। पछिल्लो समय कर्णाली विद्रोहदेखि पर्साका मुकुश चौरसिया हत्यासम्म आईपुग्दा विवाद उत्कर्षमा पुगेको हो।
अध्यक्ष एवं प्रधानमन्त्री केपी ओलीले कर्णाली विद्रोह साम्य पार्न अर्का अध्यक्ष पुष्पकमल दाहाल‘प्रचण्ड’ सँगको परामर्शपछि गत असोज २९ गते पत्र लेखेर त्यहाँका पार्टी पदाधिकारीलाई काठमाडौं आउन निर्देशन दिए। लगत्तै विद्रोहमा सहभागी पक्ष र विपक्ष काठमाडौं आए।
अध्यक्षद्वयले कर्णाली विद्रोहमा सहभागी नेतासँग छुट्टाछुट्टै आफ्नै निवासमा छलफल गरे। कर्णाली विद्रोहको समाधानको बाटो पहिल्याउन दुई अध्यक्षले तीन दिनसम्म घण्टौं परामर्श गरे। तर, दुई अध्यक्षको छलफलबाट सहमति हुन नसकेपछि गत कात्तिक ४ गते एक्कासी प्रधानमन्त्रीले सचिवालयमार्फत् चार बुँदे सहमति भएको प्रेस नोट सार्वजनिक गरे। लगत्तै अर्का अध्यक्ष प्रचण्डको सचिवालयले कर्णाली विवादमा कुनै सहमति नभएको भन्दै प्रधानमन्त्रीको खण्डन गर्यो।
कर्णाली विवादमा ओलीले दिएको चार बुदे सहमतिको पत्र बोकेर सांसद यामलाल कँडेल सुर्खेत पुगे। गत कात्तिक ७ गते प्रचण्डपक्षीय मानिने मुख्यमन्त्री महेन्द्रबहादुर शाहीले अविश्वासको प्रस्ताव फेल गराए। तर, कँडेल पक्षले अध्यक्ष ओलीले दिएको पत्रलाई आधार बनाई विवाद सल्टाउनु पर्ने अडान राखिरहेको छ।
तर, फेरि अध्यक्ष प्रचण्डले कात्तिक ७ गते नै अर्को विज्ञप्ति जारी गर्दै कर्णालीको विवाद कर्णालीकै नेताहरुले मिलाउनु पर्ने बताए। दुवै अध्यक्षले आ–आफ्ना विज्ञप्तिमार्फत् फरक÷फरक निर्देशन दिए। ओलीले मुुख्यमन्त्रीविरुद्ध पेश भएको अविश्वास प्रस्ताव फिर्ता लिने, निलम्बित प्रमुख सचेतक गुलावजंङ शाहलाई पुनर्बहाली गर्नुपर्ने, सीताकुमारी नेपालीलाई सचेतकमा फिर्ता गर्नुपर्ने र अरु पार्टी सहमति र समझदारी अनुसार गर्नुपर्ने भनियो । तर, प्रचण्डले त्यसको ठीकविपरीत त्यो विवाद सबै प्रदेश कमिटीलाई मिलाउन निर्देशन दिए। दुई अध्यक्षवीच चार बुँदे सहमति भएको विषयमा प्रचण्डले केही उल्लेख नै गरेका छैनन् ।
कर्णाली विवादमा दुई अध्यक्षको फरक–फरक निर्देशनपछि नेताहरु नै विभाजित भएका छन्। एकपक्षले प्रचण्डको निर्देशन बोकेर सोहीअनुसार वकालत गर्दै आएको छ भने अर्को पक्षले ओलीको निर्देशनको वकालत गरिरहेको छ। अब प्रचण्डपक्षीय मानिने मुख्यमन्त्री शाहीले दशैंलगत्तै मन्त्रिपरिषद पुनर्गठन गर्ने तयारी गरेका छन् । कँडेल पक्षले त्यसको निरन्तर विरोध गर्दै आएको छ । कर्णाली विवादमा दुई अध्यक्ष विभाजित भएपछि विवाद थप चर्किने देखिएको छ ।
यस्तै प्रधानमन्त्री केपी ओलीले भारतीय गुप्तचर प्रमुख सामन्तकुमार गोयलसँग भेटेको विषयमा आफ्नै पार्टीका नेताहरुले चर्को विरोध गर्दै आएका छन्। भारतीय गुप्तचर प्रमुलाई प्रधानमन्त्रीले निवासमै बोलाउनु उचित नभएको भन्दै पार्टी प्रवक्ता नारायणकाजी श्रेष्ठले सामाजिक सञ्जाल फेसबुकमार्फत् विरोध गरे। प्रधानमन्त्रीले परराष्ट्र मन्त्रालय र पार्टीमा परामर्श नगरी भारतीय गुप्तचर प्रमुखलाई भेटेर राष्ट्रियता नै कमजोर भएको श्रेष्ठको ठहर छ।
प्रधानमन्त्रीले गुप्तचर प्रमुखलाई भेटेको विषयमा श्रेष्ठ मात्रै नभई पार्टीका अरु नेताहरुले समेत चर्को विरोध जनाएका छन्। प्रधानमन्त्रीलगायत उनी पक्षका नेताहरुले भेटघाट सामान्य भएको भन्दै सामन्यीकरण गरेका छन् । तर, अध्यक्ष प्रचण्डसहित वरिष्ठ नेता माधवकुमार नेपालपक्षीय नेताहरुले प्रधानमन्त्रीको चर्को विरोध गरेका छन् । गुप्तचर प्रमुख भेटेको विषयलाई भने अध्यक्ष प्रचण्ड र वरिष्ठ नेता नेपाल खण्डन गरिसकेका छन्।
यस्तै गत ६ कात्तिकमा पर्साका मुकुश चौरसियाको पार्टीको सपथ कार्यक्रममा झडप हँुदा हत्या भयो । विन्दबासिनी गाउँपालिका सचिव समेत रहेका चौरसियाको दोहोरो झडपमा हत्या भयो। चौरसियाको हत्या भएपछि स्थायी कमिटी सदस्य मातृका यादवले कारबाही गर्न भन्दै पर्सामा तीनदिनसम्म सडक आन्दोलन नै गरे । चौरसिया हत्यामा राजकुमार गुप्ताको संलग्नता भएको भन्दै प्रहरीलाई किटानी जाहेरीसमेत दिए । तर, जिल्ला प्रहरी कार्यालय पर्साले यादवले दिएको किटानी जाहेरी लिनै मानेन।
चौरसियालाई अर्का अध्यक्ष ओली पक्षका नेताहरुले हत्या गरेको भन्दै पार्टीमा विवाद चर्किएको छ। आफ्नो पक्षका नेताहरुलाई नसमेटेको भन्दै ओली पक्षका नेता राजकुमार गुप्ताले हत्या गराएको प्रचण्ड पक्षका नेताहरुले आरोप छ । फेरि अध्यक्ष प्रचण्डले आईतबार प्रचण्डले एक विज्ञप्ती जारी गर्दै चौरसियाका हत्यारालाई हदैसम्मको कारबाही हुनुपर्ने माग गरेका छन् । तर, ओली पक्षका नेताहरुले चौरसिया हत्याको विषयमा सुनेको नसुन्यै गरेका छन् ।
पार्टीमा विवाद हुनु सामान्यजस्तै भएको स्थायी कमिटी सदस्य मणि थापाले बताए । ‘पार्टी भएपछि विवाद हुन्छ त्यसको समाधान हुन्छ’थापाले भने, ‘अहिले देखिएका समस्या छलफल गरेपछि विस्तारै हल हुदै जान्छन् ।’ अब पार्टी महाधिवेसनबाट नेतृत्व र विचारको छिनोफानो लगाउनु पर्ने थापाले बताए ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
