पानीको मूल्य बढाउन व्यापारीलाई पठाएको पत्र वाणिज्य विभागद्वारा बरामद

अर्थ समाचार

पानीको मूल्य बढाउन व्यापारीलाई पठाएको पत्र वाणिज्य विभागद्वारा बरामदव्यापारी भन्छन्- विभागको निर्देशन कार्यान्वयन गरेका हौँ

नेपाल लाइभ शुक्रबार, कात्तिक ७, २०७७ १५:०७

काठमाडौं- पानी उद्योगीहरुले जार र बोतलको पानीमा मूल्य बढाउन व्यापारीहरुलाई पठाएको गोप्य पत्र वाणिज्य, आपूर्ति तथा उपभोक्ता संरक्षण विभागले बरामद गरेको छ। नेपाल बोटल वाटर संघले आफू मातहतका पानी व्यापारीलाई जार र बोतलको पानीमा मूल्य बढाई बजारमा कार्टेलिङ गर्न पत्राचार गरेको भेटिएको हो।

वाणिज्य विभागका प्रवक्ता रविन्द्र आचार्यकाअनुसार विभागले गत साउनमा पानीको मूल्यका विषयमा गरेको अध्ययन प्रतिवेदनको पानालाई फोटोकपी गरेर त्यसैका आधारमा मूल्य तोक्न भनेर पत्राचार गरेको भेटिएको हो। ‘पानीको मूल्यमा कार्टेलिङ गरेर पानी व्यवसायीलाई पत्राचार गरेको भेटियो। बोटल वाटर संघले कि त पत्राचार गरेको होइन भनेर प्रमाणित गर्नुपर्यो, होईन भने कार्टेलिङ गरेको कसुरमा विभागले कारबाही प्रकृया अगाडि बढाउँछ’ प्रवक्ता आचार्यले भने।

विभागले बजार अनुगमनका क्रममा पानीको मूल्य बढाउन संघका तर्फबाट प्रशान्त डंगोलले हस्ताक्षर गरेको पत्र बरामद गरेको हो। ‘किन मूल्य वृद्धि भएको हो भनेर खोज्दै जाँदा हामीले बजारबाट त्यो चिट्ठी बरामद गर्यौं। पानी व्यपारीलाई मूल्यमा कार्टेलिङ गर्न संघबाट असोज १९ गते पत्राचार गरेको गरेको भेटिएको छ।’ आचार्यले भने। ‘कुन कानूनका आधारमा त्यसरी पत्राचार गरेको हो भनेर सोध्न लागेका हौं। उनीहरुलाई बोलाएर त्यो पत्र फिर्ता लिन र मूल्यका बारेमा यसअघि पठाएको पत्र झुटो हो, कार्यान्वयन नगर्नु भनेर पत्र पठाउँछौं।’

नेपाल बोतल बाटर उद्योग संघका महासचिव ध्रुव गौतमले भने विभागले तोकेको मूल्य कार्यान्वयन नगर्नु भनेर पत्र प्राप्त नभएको बताए। ‘वाणिज्य विभागले पत्रकार सम्मेलन नै गरेर भदौ १० गतेबाट लागुहुने गरी पानीको मूल्य तोकेको थियो। हामीले त्यहि कार्यान्वयन गरेका हौं। संसदीय समितिले त्यो मूल्य कायम नगर्नु भनेर निर्देशन दिएको बारे हामीलाई जानकारी छैन।’ गौतमले भने।

वाणिज्य विभागले गत भदौ १० गतेबाट लागु हुने गरी जारको पानीमा प्रतिजार ५० रुपैयाँ र बोतलमा प्रतिबोतल १६ रुपैयाँ अधिकतम खुद्रा बिक्री मूल्य (एमआरपी) तोकेको थियो। तर बजार मूल्यभन्दा बढी एमआरपी तोकिएको भन्दै प्रतिनिधि सभाअन्तर्गतको उद्योग तथा वाणिज्य र श्रम तथा उपभोक्ता समितिले उक्त मूल्य कायम नगर्न निर्देशन दिएको थियो। तर व्यापारीले भने संसदिय समितिको उक्त निर्देशन बारे जानकारी नभएको बताएका छन्।

विभागले संघका प्रतिनिधिलाई सात दिनभित्र विभागमा उपस्थित भई स्पष्टीकरण दिन भनेको छ। संसदमा विचाराधीन नै रहेको विषयलाई व्यापारीले आफूखुसी मूल्य निर्धारण गरेको भन्दै विभागले व्यापारीलाई स्पष्टीकरण सोधेको जनाएको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

नेपथ्यको धुनमा रमायो पृथ्वीकै तल्लो सहर होबार्ट

महाराजगञ्ज नर्सिङ क्याम्पसको स्ववियु अध्यक्षमा विन्दु पोखरेल विजयी

बाख्रा चराउँदै गर्दा लडेर एक जनाको मृत्यु