काठमाडौं–सामलिङ पावर कम्पनी लिमिटेडले १२ करोड ३० लाख रुपैयाँको प्राथमिक शेयर निष्काशन गर्ने भएको छ। कम्पनीले प्राथमिक शेयर निष्काशनका तथा प्रत्याभूतिकर्ताका लागि एनआईबिएल एस क्यापिटललाई धितोपत्र निष्काशन तथा बिक्री प्रवन्धकमा नियुक्त गरेको छ।
उक्त सम्झौतापत्रमा सामलिङ पावर कम्पनी लिमिटेडको तर्फबाट प्रमुख कार्यकारी अधिकृत भानु पोखरेलले र एनआईबिएल एस क्यापिटल लिमिटेडका तर्फबाट नायब प्रमुख कार्यकारी अधिकृत मेखबहादुर थापाले हस्ताक्षर गरेका छन्।
ऊर्जा डेभलपर्स प्रालिको ग्रुप कम्पनी सामलिङ पावर कम्पनी लिमिटेडले इलाम जिल्लामा निर्माणाधीन माईबेनी जलविद्युत आयोजना २०२० को अन्त्य सम्ममा सम्पन्न गर्ने लक्ष्य राखेको छ। यस आयोजनाबाट वार्षिक उत्पादन हुने ५३.२८ गिगावाट ऊर्जा ईलाम जिल्लाको गोदकस्थित नेपाल विद्युत प्राधिकरणको गोदक सवस्टेसनमार्फत् राष्ट्रिय प्रणालीमा जोडिने कम्पनीले जनाएको छ।
प्रवर्द्धक कम्पनी सामलिङ पावर कम्पनीका अध्यक्ष तथा ऊर्जा डेभलपर्स प्रालिका अध्यक्ष विजयबहादुर राजभण्डारीले विद्यमान प्रतिकूल वातावरणका बाबजुद आयोजनाको सिभिल निर्माण कार्य सुचारु गरी सम्पन्न हुने अन्तिम चरणमा रहेको तथा आयोजनाको विद्युत गृहमा टोसिवा कम्पनीका प्राविधिकहरुद्धारा इलेक्ट्रोमेकानिकल यन्त्र उपकरणहरु जडान गर्ने कार्य भइरहेको बताए। उनका अनुसार आगामी ३ महिनामा जडान एवं परीक्षण सम्पन्न गरिनेछ।
कम्पनी स्थापनाको चार वर्षभित्र ऊर्जा डेभलपर्सले सम्बद्ध कम्पनीहरुमार्फत् ४९ मेगावाटको अर्धजलाशययुक्त आयोजना निर्माणाधीन अवस्थामा रहेको तथा अन्य ६ आयोजनाहरु निर्माण विकासको विभिन्न चरणमा रहेका छन् ।
कम्पनीले निश्चित क्षेत्रमा साझा पूर्वाधार तथा संरचना स्रोत उपयोग गरी दिगो जलविद्युत आयोजनाहरु निर्माण गर्ने रणनीति लिएको हुनाले आयोजनाको सार्वजनिक शेयर निष्काशनबाट स्थानीय बासिन्दा तथा लगानीकर्ताले उच्च प्रतिफल प्राप्त गर्ने विश्वास लिएको अध्यक्ष राजभण्डारीले जानकारी दिए।
उनले जलविद्युत् आयोजना न्यूनतम लागत, उच्च गुणस्तर तथा प्रतिस्पर्धी मूल्यमा निर्माण गर्नेतर्फ ऊर्जा डेभलपर्स उन्मुख रहेको जानकारी दिंदै मुलुकको आन्तरिक तथा क्षेत्रीय बजार अध्ययन गरी आगामी दिनमा जलाशय र अर्धजलाशययुक्त आयोजना निर्माण गरिने बताए।
अध्यक्ष राजभण्डारीले उक्त आयोजनामा बैंक तथा वित्तीय संस्थाहरु पनि विश्वस्त भएकाले छोटो समयमा निर्माण सम्भव भएको उल्लेख गर्दै आयोजनामा आबद्ध सबैको सराहना गरे।
आयोजनाको वित्तिय व्यवस्थापन नेपाल एसबिआई बैँक लिमिटेडको अगुवाईमा सिद्धार्थ बैँक लिमिटेडको सहभागितामा भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
