काठमाडौं–नेपाल वायुसेवा निगमका महाप्रबन्धक प्रकाश पौडेलले निगमभित्र देखिएको बेथिति र अराजकता नियन्त्रण गर्न १६ बुँदे निर्देशन जारी गरेका छन्। केही समयदेखि निगममा देखिएको अनुशासनहीनता तुरुन्त सुधार गर्नुपर्ने चरणमा आइसकेको भन्दै उनले अनुशासनका अधारभूत नियम कडाइका साथ पालना गर्न निर्देशन दिएका हुन्।
निर्देशनमा बिहान १० बजे सबै कर्मचारी कार्यालय आइपुग्नुपर्ने, यदि कुनै कारणले ढिला भएमा एक महिनामा चार पटकसम्म १५ मिनेटका दरले छुट दिने तर सो हदभन्दा बढी भएमा गयल जनाउने, साथै ढिलो आएको दिन चाँडै निस्केमा उक्त छूट पनि नदिने उल्लेख छ।
त्यस्तै, खाजा समय ३० मिनेटमात्र हुने, कार्यालयमा हाजिर गरी बाहिर गएमा अनुशासनहीनताको कारबाही गर्ने, पोशाक र परिचय पत्र नलगाई कार्यालय आउने कर्मचारीको नाम सुरक्षा अधिकारीलाई टिपाउन र एक महिनामा चार पटकभन्दा बढी यस्तो हेलचेक्र्याइँ गरेमा कार्यालय प्रवेशमै रोक लगाउन पनि सम्वन्धित विभागहरुलाई निर्देशन दिएका छन् ।
विना काम अबेरसम्म बसेर निस्केकै भरमा ओभरटाइम गणना नगर्न र एक घण्टाभन्दा कम समयको ओभरटाइमको गणना नगर्न पनि उनले निर्देशन दिएका छन्। जारी निर्देशनमा महिनाको ५ गतेसम्ममा प्रत्येक विभागका विभागीय प्रमुखहरुले मासिक प्रगति विवरण अनिवार्य रुपमा पठाउनु पर्ने , विभागीय प्रमुखहरुले प्रयोग गर्ने सवारी साधन निगममै पार्किङ गर्नुपर्ने, निगमका प्रवक्ता र सहप्रवक्ताले विभाग, महाशाखा वा शाखा जहाँबाट पनि सोझै सूचना माग भएमा २० मिनेटभित्र जानकारी उपलब्ध गराउनु पर्ने लगायतका विषय उल्लेख छन्।
धरासायी बनेको निगमलाई आर्थिकरुपले सवल बनाउन पहिला संगठनभित्रको आरण र अनुशासनलाई नै वलियो बनाउनु पर्ने भन्दै महाप्रवन्धक पौडेलले प्रारम्भीकरुपमा सुधारको थालनी गरेका हुन्। अहिले पनि निगमलाई सुधार्न नसके कहिल्यै नसकिने भन्दै महाप्रबन्धक पौडेलले प्रयास सुरु गरेका छन् । विहान, बेलुकी जुनसुकै समयमा त्रिभुवन विमानस्थलअन्तर्गत निगमका कामहरुको छड्के गर्ने कार्य पनि उनले सुरु गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
