काठमाडौं- बुधबार ५ हजार ७४३ जनामा कोरोना संक्रमण भएको छ। एकै दिनमा यति धेरै कोरोना संक्रमित भेटिएको यो पहिलो पटक हो। योसँगै नेपालमा कोरोना संक्रमितको संख्या १ लाख ४४ हजार ८७२ पुगेको छ।
बुधबार २० हजार ११८ जनाको कोरोना परीक्षण गर्दा ५ हजार ७ सय ४३ जनामा कोरोना संक्रमण देखिएको हो। यो भनेको करिब २८ (२७ दशमलव ५४) प्रतिशत हो। यसको अर्थ जम्मा एक सय जनाको परीक्षण गर्दा २८ जनामा कोरोना संक्रमण देखिएको भन्ने हो।
विश्व स्वास्थ्य संगठनका अनुसार कुल परीक्षणको १० देखि १२ प्रतिशतभन्दा बढीमा संक्रमण देखिए परीक्षणको अभाव भएको मानिन्छ। बुधबारको तथ्यांक हेर्दा नेपालमा पनि परीक्षणको अभाव रहेको र तत्कालै परीक्षणको दायरा बढाउनुपर्ने देखिन्छ।
हाल देशभर ४४ हजार ४७६ जना सक्रिय संक्रमित छन्। आज १४ हजार ६७६ जना संस्थागत आइसोलेसनमा छन् भने बाँकी होम आइसोलेसनमा छन्।
काठमाडौंमा २३९१ जना, भक्तपुरमा १७३ र ललितपुरमा ५४३ जना नयाँ संक्रमित भेटिएको स्वास्थ्य तथा जनसंख्या मन्त्रालयका प्रवक्ता डा जागेश्वर गौतमले जानकारी दिएका हुन्।
देशमा कुल संक्रमितमध्ये ६८.७ प्रतिशत निको भएका छन्। हाल क्वारेन्टाइनमा रहनेको संख्या ४ हजार ६५ छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।