मोटरसाइकल चोरीमा पक्राउ परेका ३ अभियुक्त र बरामद भएका मोटरसाइकल
काठमाडौं– गत आइतबार बिहान ९ बजे। भक्तपुर मध्यपुर ठिमी नगरपालिका ३ कौशलटार। जहाँ रोहन पराजुलीको घर अगाडि पार्किङ गरेर राखिएको थियो लु ६३ प ०७४ नम्बरको एनएस२०० सिसीको मोटरसाइकल।
पार्किङ गरेको मोटरसाइकल नै गायब भएपछि महानगरीय प्रहरी वृत्त ठिमीमा खबर पुग्यो, ‘कौशलटारबाट मोटरसाइकल चोरी भयो।’ उक्त सूचनापश्चात वृत्त ठिमी र अपराध महाशाखा पिसिसिबीको संयुक्त टोली परिचालन भयो ।
अनुसन्धानका क्रममा प्रहरीले फेला पार्यो महत्वपूर्ण क्लु। मोटरसाइकल चोरी भएको भनिएको ठाउँमा एक व्यक्ति आई फोनको रिचार्ज गरेको सिसीटिभी फुटेज देखियो । रिचार्ज गर्नु र सोही समयमा नै मोटरसाइकल हराउनुले झनै संका बढायो ।
प्रहरीले रिचार्ज गरेर फालेको कार्ड भुँइबाट उठायो । र, सुरु गर्यो ‘अपरेशन रिचार्ज कार्ड।’ रिचार्ज गरेर फालिएको कार्डबाट सुरु भएको अनुसन्धानले हरायो भनेर तत्कालै जानकारी गराएको मोटरसाइकलमात्रै भेटाएन थप अरु तीन वटा मोटरसाइकल पनि भेटिए र समातिए चोरका तीन गिरोह ।
फालिएको रिचार्ज कार्डबाट प्रहरीले उक्त कार्ड कति नम्बरमा रिचार्ज भएको छ भन्ने पत्ता लगायो। सोही फोन नम्बरलाई आधार बनाई अनुसन्धान गर्दै गर्दा सोही दिन पुनः साढे ३ बजे अर्को मोटरसाइकल चोरी भएको सूचना प्रहरीलाई प्राप्त भयो ।
मध्यपुर ठिमी नगरपालिका–२ मगरगाउँस्थित साजन न्यौपानेको घर अगाडि पार्किङ गरिराखेको प्रदेश ३–०२–००३ प ३८३५ नम्बरको एनएस२०० सिसी पल्सर मोटरसाइकल चोरी भएको जानकारी प्रहरीकहाँ आएको थियो ।
त्यसपछि यी चोरीका घटनालाई प्रहरीले संयुक्त रुपमा अनुसन्धान अघि बढायो। अनुसन्धानका क्रममा मध्यपुर ठिमी नगरपालिका–८ बोडेमा रहेको बोडे पेट्रोल पम्पनजिकै रहेको गार्मेन्टअगाडि एक मोटरसाइकलको नम्बर प्लेट परिवर्तन गर्दै गरेको प्रहरीले फेला पार्यो।
लु ६३ प ७०७४ नम्बरको २२० सिसीको एनएस पल्सर मोटरसाइकलमा नम्बर प्लेट परिवर्तन गरेर प्रदेश ३–०२–०१७ प ६१६७ को नम्बर प्लेट जडान गरिएको प्रहरीले पुष्टि गर्यो। अब उक्त मोटरसाइकल लिन आउने व्यक्तिको निगरानी गर्नु थियो प्रहरीलाई । नभन्दै दिउँसो साढे ४ बजे नम्बर प्लेट परिवर्तन गरेर प्रदेश ३–०२–०१७ प ६१६७ बनाइएको मोटरसाइकल लिन आएको एक व्यक्ति पक्राउ परे ।
महानगरीय प्रहरी वृत्त ठिमीका डिएसपी ऋषिराम कँडेलका अनुसार उनी थिए रामेछाप घर भई मध्यपुर ठिमी नगरपालिका–८ बोडे बस्ने १८ वर्षीय अरुण तामाङ थिए। उक्त मोटरसाइकल पार्किङ गरी भाग्दै गर्दा करिब २०० मिटर टाढाबाट प्रहरीले उनलाई नियन्त्रणमा लिएको थियो ।
तामाङकै बयानका आधारमा दोलखाको भीमेश्वर नगरपालिका–४ घर भई मध्यपुर ठिमी नगरपालिका–८ बोडे बस्ने २२ वर्षीय महेश तामाङ पक्राउ परे ।
आफ्नै कोठाबाट पक्राउ परेका महेशले नै चोरी गर्ने बेला आफ्नो मोबाइलमा रिचार्ज गरेको पाइएको अनुसन्धानको क्रममा खुल्यो । उनैले रिचार्ज गरेर फालेको कार्डबाट प्रहरी चोरीको गिरोहसम्म पुगिएको डिएसपी कँडेलले बताए ।
त्यसपछि महेशसँगको बयानका आधारमा सिन्धुपाल्चोक पाचँपोखरी थाङपाल गाउँपालिका–७ घर भई काठमाडौं कागेश्वरी नगरपालिका–९ मुलपानी बस्ने २९ वर्षीय मनोज लामा पनि मुलपानीबाट पक्राउ परे।
मनोजलाई चोरीको प्रदेश ३–०२–०१८ प ४७४१ नम्बरको २२० सिसिको निलो पल्सर मोटरसाईकल सहित पक्राउ गरिएको हो । महेश तामाङको प्रारम्भिक बयानका आधारमा प्रदेश ३–०२–००३ प ३८३५ नम्बरको २२० सिसीको पल्सर एनएस मोटरसाइकल मध्यपुर ठिमी नगरपालिका–५ कमेरोटारबाट बरामद गरिएको छ।
यसरी रिचार्ज गरेर फालिएको कार्डका आधारमा प्रहरी मोटसाइकल चोरी गर्ने गिरोहसम्म पुग्न सफल भएको हो । उनीहरुबाट चोरी भएका चार थान मोटरसाइकल प्रहरीले बरामद गरेको छ।
मनोज तामाङ र महेश तामाङबाट बरामद भएका चोरीका मोटरसाइकल धनी भने खुल्न सकेका छैनन्। बाँकी दुई वटा मोटरसाइकल भने पहिले नै चोरी भएको भनेर प्रहरीकहाँ उजुरी आएकाले ती मोटरसाइकल सम्बन्धित धनीलाई बुझाउने तयारी रहेको वृत्त ठिमीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786875778.jpg)
-1786602170.png)
