काठमाडौं– राष्ट्रिय खेलकुद परिषद् (राखेप) ले राष्ट्रिय फुटबल टिमको प्रशिक्षण सुरु गर्न अनुमति दिएको छ। अखिल नेपाल फुटबल संघ (एन्फा) ले शुक्रबार राष्ट्रिय टिमको अभ्यास गर्न राखेपले स्वीकृति दिएको जानकारी दिएको हो।
रोकिएको खेलकुद अभ्यास पुनः सुरु नहुँदा सरकारप्रति खेलाडी र खेलकर्मीहरु आक्रोश पोख्दै आएका थिए। बुधबारमात्रै कप्तान किरण चेम्जोङले सरकारलाई खुल्ला पत्र लेख्दै छिटो खेलकुद गतिविधि सञ्चालन गर्न आग्रह गरेका थिए। लामो समयदेखि खेलकुद गतिविधि ठप्प हुँदा खेलाडीमा विभिन्न समस्या पर्दै आएको छ।
एन्फाले बंगलादेशसँगको अन्तर्राष्ट्रिय मैत्रीपूर्ण फुटबल खेलका लागि राखेपसँग प्रशिक्षणको अनुमति माग गर्दै आएको थियो। बंगलादेशसँग उसैको भूमिमा नेपालले दुई मैत्रीपूर्ण खेल खेल्नेछ। अभ्यास खेल नोभेम्बर ११–१९ को विन्डोमा हुनेछ। राखेपले अनुमति दिएपनि नेपाली खेलाडीले भने दसैँपछि मात्रै अभ्यास थाल्नेछ।
यसअघि सरकारले भदौं एक गतेदेखि कोरोना भाइरसविरुद्धको विशेष सुरक्षा अपनाएर अभ्यास गर्न अनुमति दिएको थियो। तर फेरि काठमाडौं उपत्यकामा कोरोनाको संक्रमण ह्वातै बढेपछि सुरु नभई स्थिगित भएको थिए।
एन्फाले पनि साउन अन्तिम सातामा खेलाडीको परिक्षण गरी बन्द प्रशिक्षणमा राख्न तयार भएको थियो। तर विश्व फुटबल महासंघ (फिफा) ले विश्वकप छनौटअन्तर्गत दोस्रो चरणका खेलहरु स्थगित गरेपछि एन्फाले पनि बन्द प्रशिक्षणलाई तत्काल रोकेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
