काठमाडौं–राष्ट्रिय मानव अधिकार आयोगले भक्तपुरमा दुई वर्षअघि भएकाे इन्काउन्टरमा संलग्न भएका ५ प्रहरी अधिकारीलाई कारबाही गर्न सिफारिस गरेको छ।
बालक निशान खड्काको अपहरणपश्चात भएको हत्यामा संलग्नलाई पक्राउ गर्ने क्रममा महानगरीय प्रहरी अपराध महाशाखाको टोलीको गोली लागेर अपहरणकारी भनिएका अजय तामाङ र गोपाल तामाङको मृत्यु भएको थियो । उक्त इन्काउन्टर फेक रहेको र प्रहरीले पक्राउ गरेर गोली हानेको भन्दै तामाङद्वयका परिवारले निस्पक्ष छानबिनको माग गर्दै आयोगमा उजुरी दिएका थिए ।
सोही उजुरीको छानबिनपछि आयोगले ५ प्रहरीलाई कारबाही गर्न सिफारिस दिएको हो। आयोगका सदस्य मोहना अन्सारीका अनुसार डिएसपी रुगम कुँवर, सईहरु दिपेन्द्र चन्द, प्रशन्न मल्ल, रन्जित लामा र असई राजन खड्कालाई कारबाहीको सिफारिस गरिएको छ ।
सिफारिस गरिएकामध्ये प्रसन्नले जागिर छाडिसकेका छन् भने रन्जित प्रहरी निरीक्षक भएका छन् ।
‘कुनै पनि एंगलबाट उक्त घटनालाई इन्काउन्टर भन्न मिल्ने देखिँदैन। नियन्त्रणपश्चात हत्या भएको आयोगको ठहर हो,’ अन्सारीले भनिन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।