फाइल तस्बिर
काठमाडौं- असोज १६ गते एकैदिन नेपालमा २ हजार ७२२ जना संक्रमित भेटिए। जसमध्ये १ हजार ६ सय ३८ जना संक्रमित काठमाडौं उपत्यकाका मात्र थिए। काठमाडौं उपत्यकामा एकै दिन यति धेरै संख्यामा संक्रमित भेटिएको यो नै पहिलो पटक थियो।
नेपालमा हाल दैनिक करिब दुई हजारको आसपासमा संक्रमितहरु थपिँदै गएका छन्। त्यसमा आधाभन्दा बढी संक्रमित काठमाडौं उपत्यकाका मात्र हुन्छन्। अझ असोज १८ गतेको तथ्यांक हेर्ने हो भने त ७१ प्रतिशत संक्रमित काठमाडौं उपत्यकामा मात्र भेटिएका थिए।
सुरुवाती दिनमा नेपालमा भेटिने अधिकांश संक्रमित लक्षणविहीन हुने गर्थे। त्यसबेला काठमाडौं उपत्यकामा संक्रमितको हुनेहरुको संख्या निकै न्यून थियो।
पछिल्लो समय भेटिएका नयाँ संक्रमितहरुमा कुनै न कुनै लक्षणसमेत देखिन थालेको छ। हाल संस्थागत आइसोलेसनमा रहेका अधिकांश संक्रमितमा कुनै न कुनै लक्षण भएर नै अस्पताल भर्ना हुने गरेका छन्। त्यसमा पनि अहिले आइसियूमा भर्ना हुने संक्रमितको संख्या बढ्दो छ।
स्वास्थ्य तथा जनसंख्या मन्त्रालयका अनुसार हाल देशभर २ सय २६ जना संक्रमित आइसियूमा उपचाररत छन्। यसअघि १७ गते आइसियूमा भर्ना हुने संक्रमितको संख्या २ सय १० थियो।
संक्रमितको संख्या बढ्दै जाँदा उपत्यकाको अस्पतालमा आइसियूको अभाव हुन थालेको छ। अस्पतालका आइसियू कोरोना संक्रमितले भरिभराउ छन्। यहाँसम्म कि गम्भीर अवस्थाका संक्रमितले पनि आइसियू नपाउँदा पीडा सहँदै पालो कुर्नैपर्ने बाध्यता छ।
धेरै कोरोना संक्रमितको उपचार हुने अस्पताल मध्य एक हो, बलम्बुस्थित नेपाल एपिएफ अस्पताल। आइतबारसम्मको तथ्यांक अनुसार यस अस्ततालमा १ सय ७४ जना संक्रमित उपचाररत छन्। जसमध्ये १९ जना आइसियू, २ भेन्टिलेटर, १ सय १८ पोजेटिभ वार्ड र ३७ जना आइसोलेसन वार्डमा छन्।
हालसम्म ७६ जना संक्रमित आइसियूमा भर्ना भएको अस्पतालका प्रहरी उपरीक्षक डा प्रवीन नेपालले बताए। संक्रमितको चाप बढ्दै जाँदा आइसियूको व्यवस्थापन गर्न समस्या हुने गरको उनले बताए। उनले भने, 'बिरामीहरु आइसियू चाहियो भनेर आउँछन्। आइसियूमा भर्ना हुने संक्रमितको चाप बढ्दो छ। त्यसैले व्यवस्थापन गर्न समस्या पनि हुन्छ।'
कोरोना संक्रमितको उपचारका लागि एपिएफ अस्पतालले १ सय २० शय्याको आइसोलेसन, २० आइसियू र ८ वटा भेन्टिलेटरको व्यवस्था गरेको छ।
कोरोना संक्रमितको संख्या बढ्दै गएपछि सरकारले टेकुस्थित शुक्रराज ट्रपिकल तथा सरुवा रोग अस्पताललाई कोरोना विशेष अस्पताल बनाएको छ। कोरोना संक्रमितको उपचारका लागि शुक्रराज अस्पतालले २० शय्या छुट्याएको छ। तर हाल अस्पतालको आइसियू शय्या भरिभराउ छ।
अस्पतालका प्रवक्ता डा अनुप बाँस्तोलाका अनुसार २० जना संक्रमित आइसियूमा छन्। कोभिड वार्डमा २६ र स्पेशन कोभिड क्याबिनमा ५ जना संक्रमितको उपचार भइरहेको छ। अहिले अस्पतालको आइसियू दैनिकजसो नै भरिने गरेको डा बाँस्तोला बताउँछन्।
त्रिवि शिक्षण अस्पतालले पनि कोरोना संक्रमितको उपचारका लागि १० आइसियू र ५ भेन्टिलेटरको व्यवस्था गरेको छ। तर त्रिवि शिक्षण अस्पतालमा पनि आइसियू खाली छैन।
कोभिड १९ व्यवस्थापन समितिका सदस्य डा सबिन थपलियाले अस्पतालमा १० जना संक्रमित आइसियूमा रहेको जानकारी दिए। जसमध्ये ४ जनालाई भेन्टिलेटरमा राखिएको छ। उनका अनुसार हाल ९१ जना संक्रमित उपचाररत छन्।
आइसियूमा भर्ना हुने संक्रमित यहि दरमा बढ्दै गए मृतकको संख्या बढ्दै जाने इपिडिमियोलोजी तथा रोग नियन्त्रण महाशाखाका पूर्व निर्देशक डा बाबुराम मरासिनी बताउँछन्।
उनी भन्छन्, यसरी नै आइसियूमा भर्ना गर्नुपर्ने बिरामीको संख्या बढ्दै गए। मृतकको संख्या पनि बढ्दै जान्छ।
सरकारले तत्काल आइसियूको शय्या थप गर्नुपर्नेमा उनी जोड दिन्छन्। उनका अनुसार आइसियूमा भन्दा पनि सरकारले कोरोना संक्रमितलाई हाइ केयरको उपचार गर्नुपर्ने बताए। भेन्टिलेटर चाहिने संक्रमितलाई आइसियूलाई भर्ना गरेपनि अन्यलाई हाइ केयरको उपचार गरे मात्र पुग्ने उनको भनाई छ।
उनले भने, भेन्टिलेटर चाहिने संक्रमितलाई आइसियूमा राख्नुपर्छ। तर अन्य संक्रमितलाई हाइ केयरको उपचार गर्ने व्यवस्था मिलाउने या आइसियूको शय्याको थप्न आवश्यक छ।
पाटन र वीर अस्पतालमा पनि आइसियू भरिएका छन्। आइसियू भरिँदा गम्भिर अवस्थाका संक्रमितले समेत पालो कुरेर बस्नुपर्ने अवस्था आएको भन्दै अस्पतालका चिकित्सकहरुले चिन्ता व्यक्त गरेका छन्।
पाटन अस्पतालका एक चिकित्सकले भने, 'यस्तो गम्भीर अवस्था आइसक्दा पनि स्वास्थ्य मन्त्रालयले तयारी नगर्दा दुख लागेको छ।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1769055728.png)
-1764146706.png)
