काठमाडौं- इन्डियन प्रिमियर लिग (आइपिएल)मा रोयल च्यालेन्जर्स बैंग्लोरका लागि अहिले सुरुवातका खेल हेर्दा उपाधिमा आश गर्न मिल्ने छ। चार खेलमा तीन खेल जितेर बैंग्लोर अंक तालिकामा दोस्रो स्थानमा छ। तर कप्तान विराट कोहलीका लागि सोचेजस्तो हुन समय लाग्यो।
पहिलो खेलमा सनराइजर्स हैदराबादलाई १० रनले जित्दा विराटले १३ बलमा १४ रन मात्र बनाउन सकेका थिए। दोस्रो खेलमा किंग्स इलाभेन पञ्जावसँग २०७ रनको लक्ष्य पछ्याउँदा बैंग्लोर १०९ रनमा नै समेटियो। जहाँ विराटले पाँच बल खेलेर एक रन मात्र बनाउन सकेका थिए।
बैंग्लोरले तेस्रो खेलमा मुम्बई इन्डियन्सलाई सुभर ओभरमा हराएको थियो। २०१ रनमा बराबरी भएपछि सुपर ओभरमा पुगेको खेलमा विराटको योगदान लक्ष्य पछ्याउँदा राम्रो हुन सकेन। ११ बल खेलेका उनले ३ रन मात्र बनाएका थिए। सुपर ओभरमा भने उनी देखिएका थिए। अन्तिम बलमा जितको रन उनैले बनाए।
शनिबार राजस्थान रोयल्ससँग भएको खेलमा भने विराट पुरानो लयमा फर्किएको जस्तो देखियो। राजस्थानले दिएको १५५ रनको लक्ष्य पछ्याउँदा बैंग्लोरका लागि विराटले सम्हालिएर ५३ बलमा ७२ रन बनाए। जहाँ ७ चौका र २ छक्का हानेका थिए। पहिलो तीन खेलमा गरेर १८ रन मात्र बनाएका विराटका लागि त्यो ठूलो राहत भयो।
राजस्थानविरुद्ध आठ विकेटमा जितमा खुसी देखिएका विराटले खेलको दौरान बैंग्लोरका विकेटकिपर जस बटलरसँग आफूले ‘क्रिकेटप्रति आफ्नो माया र घृणा दुवै रहेको’ बताएको सुनाए। जसमा खेलाडीका रुपमा खेलमा भोग्नुपर्ने भाग्यको अवस्थामा उनको तर्क थियो।
‘क्रिकेट असाध्यै रमाइलो खेल हो, मैले ब्याटिङ गरिरहेका बेला जोसलाई भनेको पनि थिएँ कि म यो खेललाई मन पराउँछु र घृणा पनि गर्छु’, विराटले खेलपछिको कुराकानीमा भने, ‘यो यस्तो कुरा हो जुन तपाइँले खेलाडीका रुपमा बुझ्नुपर्छ। जब धेरै खेल खेलिरहेको हुन्छौ तब कहिलेकाहिँ आफूले चाहेको जस्तो गर्न नसकिरहेको महसुस हुन्छ।’
‘टिमको नै खेल नराम्रो भइरहेको छ भने निराश भइन्छ, तर टिमले राम्रो गरिरहेको छ र तपाइँको खेल मात्र राम्रो भएको छैन भने अब मैले के राम्रो गर्न सक्छु र टिमको लागि योगदान गर्न सक्छु भनेर सोच्ने समय पाउनुहुनेछ’ उनले भने।
बैंग्लोरका मुख्य प्रशिक्षक साइमन काटिज भने विराटको खेल लयमा प्रशिक्षण टिमलाई चिन्ता नभएको बताउँछन्। मुम्बईविरुद्धको सुपर ओभरलाई हेरेर पनि आत्तिनु नपर्ने उनको तर्क थियो। ‘यो हेरिसक्दा विराटलाई लय गुमाएका खेलाडीका रुपमा हेर्न सकिँदैन। उनले अभ्यासका बेला गरेको ब्याटिङ हेरिरहँदा उनले राम्रो गर्छन् भन्ने नै लागिरहेको थियो। जुन सुरुका खेलहरुमा हुन सकेन। क्रिकेटमा कहिलेकाहिँ यस्तो हुन्छ’ काटिजले भने।
मुम्बईविरुद्धको सुपर ओभरपछि नै विराटले लय समातेको काटिजको तर्क छ। ‘लाइन छाडेर अघि बढेर सुपर ओभरमा विराटले विश्वास बनाए। राम्रो सट हाने। त्यही लय अहिले राजस्थानविरुद्ध पनि निरन्तर रह्यो। उनले अभ्यासका बेला पनि सही बलमा सही सट खेलेर राम्ररी ध्यान दिइरहेका थिए’ उनले भने।
विराट भन्छन्– ‘यो यस्तो प्रतियोगिता हो जुन एकैछिनमा तपाइँको नियन्त्रणबाट बाहिर पुगिदिन सक्छ। विगतमा पनि हामीले त्यो अनुभव गरेका छौँ। जब राम्रो सुरुवात भइरहेको छ भने त्यसलाई निरन्तरता दिनमा विशेष ध्यान लगाउनुपर्ने हुन्छ। अब अगाडिका खेलहरुमा पनि राम्ररी अघि बढौँ भन्ने छ।’
बैंग्लोरले अब शीर्ष स्थानको दिल्ली क्यापिटल्ससँग सोमबार बेलुका खेल्दैछ। दिल्लीको पनि चार खेलमा समान ६ अंक हुँदा नेट रन रेटका आधारमा शीर्ष स्थानमा रहेकोछ। दिल्लीले शनिबार राति नै कोलकाता नाइट राइडर्सलाई १८ रनले हराएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791765483.jpg)
-1786602170.png)
