काठमाडौं- हिजोआज इस्कोको खेल हेर्दा उनी हराइरहे जस्ता लाग्छन्। विपक्षीलाई पछि पारेर बल बढाउने र भिडभाड छिचोलेर उत्कृष्ट पास दिन सक्ने इस्को अहिले कता छन्? स्पेनिस क्लब रियल मड्रिड मिडफिल्डर इस्कोले विपक्षीलाई दिने उस्तै पुरानो डरको खोजी भइरहेको छ।
इस्कोको खेल हेर्दा आनन्द लाग्ने शैली पनि हो। कठिन अवस्थामा समेत उनी सरल देखिएर अघि बढ्न सक्छन्। उनको विगत मैदानमा गतिशील र तीब्र थियो। तर अहिले उनको नियन्त्रणमा नै बल हुँदा पनि केही होला भन्ने आश कमजोर बनिरहेको छ।
गएको बिहीबार ला लिगामा रियल भायाडोलिडसँगको खेल इस्कोको पछिल्ला कमजोर अवस्थाको प्रमाण हो। पहिलो हाफमा प्रभाव पार्न नसकेका इस्कोको खेल दोस्रो हाफको सुरुवातमा पनि राम्रो भएन। यसैले खेलको ५७औँ मिनेटमा उनको स्थानमा मार्को एसेन्सियो ल्याइए।
त्यसअघि पहिलो खेलमा रियल सोसिडाडसँग गोलरहित बराबरी खेल्दा इस्को टिममा थिएनन्। दोस्रो खेलमा रियल बेटिसविरुद्ध इस्को सुरुवाती ११ मा थिएनन्। खेलको ४६औँ मिनेटपछि मार्टिन ओडेगार्डको स्थानमा खेलेका उनले आफ्नो पुरानो प्रभाव देखाउन सकेनन्।
एक सयम रियल मड्रिडमा क्रिष्टियानो रोनाल्डो, करिम बेन्जेमा र ग्यारेथ बेल लयमा रहँदा समेत प्रशिक्षक जिनेदिने जिदानले इस्कोमाथि विश्वास देखाएका थिए। त्यसको कारण उनको खेल शैली नै थियो। गोल, पास र हरेक खेलमा उनी फरक खेलाडी जस्ता स्पष्ट देखिन्थे।
अहिले स्पेन राष्ट्रिय टिमका प्रशिक्षक लुइस इनरिकले समेत इस्कोलाई राष्ट्रिय टिममा राखेका छैनन्। त्यसको कारण पछिल्लो समय खँस्किदो उनको खेल शैली नै हो। इनरिकले चाहिरहेको तीब्रता इस्कोले अहिले खेलमा दिन सक्ने देखिएको छैन। जब कि दुई वर्षअघिसम्म इस्को आफ्नो टिमको महत्वपूर्ण खेलाडी रहेको इनरिक बताइरहेका हुन्थे।
त्यसले रियल मड्रिडमा जिदानको विश्वास कहिलेसम्म इस्कोमाथि रहन्छ भन्नेमा पनि प्रश्न देखिएको छ। मड्रिडमा प्रशिक्षक सान्टियागो सोलारीको समयमा त इस्को अझ हराइरहेका देखिन्थे। सोलारीको समय लामो समय रहेन, जिदान फर्किएपछि उही लयमा इस्को फर्कने आश पनि पूरा भइरहेको छैन।
जिदान प्रशिक्षकमा दोस्रो पटक नियुक्त भएदेखि यता इस्कोले ४३ खेल खेलेका छन्। जसमध्ये २७ खेलमा उनी सुरुवाती ११ मा रहेर खेले। जसमा उनले पाँच गोल गरेका छन्। पछिल्लो पटक कोरोना माहामारी सुरु हुनुअघि उनले म्यानचेस्टर सिटीविरुद्ध गरेको गोलपछि ९ खेलमा गोल गर्न सकेका छैनन्।
पछिल्लो समय चोटका कारण सताइनुले पनि इस्कोलाई आफ्नो लय समात्न कठिन भइरहेको छ। चोटकै कारण प्रिसिजनमा राम्ररी तयारी गर्न नपाएका कारण पनि अहिले नयाँ सिजन उनलाई मुस्किल भइरहेको छ।
रियल मड्रिडले यो सिजन ला लिगामा तीन खेल खेलेको छ। जसमा दुई जित र एक बराबरीसहित मड्रिडको सात अंक रहेको छ। आइतबार बेलुका पौने ८ बजे मड्रिड र लेभान्टेविरुद्ध खेल हुँदैछ। जसमा इस्कोको भूमिका अगाडि कस्तो हुनेछ भन्ने समेत देखिने आश छ।
२८ वर्षका इस्कोका लागि यो उमेर उच्च खेल प्रदर्शनको समय हुनुपर्ने हो। तर अहिले उनलाई टिममा राख्नुपर्ने र नराख्नुपर्नेमा बहस भइरहनु दुःखद छ। स्पेनिस टिम भ्यालेन्सियामा युवा समय बिताएका इस्को भ्यालेन्सिया सिनियर टिमबाट २०११ मा मालागा गएका थिए। जहाँबाट २०१३ मा उनी रियल मड्रिड गए।
रियल मड्रिडमा उनले दुई पटक ला लिगा, एक कोपा डेल रे, एक सुपर कोपा, चार च्याम्पियन्स लिग, दुई युइएफए सुपर कप र दुई क्लब विश्वकप जितेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789383080.png)
