फाइल तस्बिर
काठमाडौं– नेपाली कांग्रेसका ५ केन्द्रीय सदस्यहरु ५ दर्जनभन्दा बढी नेता तथा कर्मचारीलाई कोरोना संक्रमण पुष्टि भएको छ। केन्द्रीय सदस्यहरू गगन थापा, अर्जुननरसिंह केसी, जंगीलाल राय, कल्पना चौधरी र शम्भुलाल श्रेष्ठलाई कोरोना संक्रमण पुष्टि भएको हो।
थापा र केसीले शनिबार राती ट्विट गर्दै आफूलाई कोरोना संक्रमण भएको र सम्पर्कमा आएकाहरूले सजकता अपनाउन आग्रह गरेका छन्। शनिबार आएको पिसिआर परिक्षण रिपोर्टमा यीमध्ये कम्तीमा ६२ जनामा कोराना संक्रमण देखिएको स्रोतले बताएको छ।
कांग्रेस केन्द्रीय समिति बैठकअघि पार्टीले दलको मुख्यालयका कर्मचारी, सुरक्षाकर्मी, सवारी चालक र केन्द्रीयस्तरका नेताहरुको गरी झण्डै २ सय ७० जनाको दुई दिनअघि स्वाब परीक्षण गरेको थियो।
‘पोजेटिभ देखिएकामध्ये अहिलेसम्म चार जना केन्द्रीय सदस्य हुनुहुन्छ, अरु पनि हुन सक्नुहुन्छ’ कांग्रेस मुख्यालयका एक कर्मचारीले शानिबार साँझ भने, ‘अरु कांग्रेस सभापति देउवासहित अरु नेताहरु पनि कन्ट्याक ट्रेसिङमा पर्नुभएको छ।’
पार्टीभित्र उत्पन्न विवाद सुल्झाउन भन्दै शुक्रबारदेखि सानेपा मुख्यालयमा शीर्ष नेताहरुसहित कांग्रेस पदाधिकारी बैठक चलिरहेको थियो।
दलका प्रभावशाली नेताहरुलाई कोरोना देखिएपछि आइतबार बिहान ९ बजेका लागि तय गरिएको पार्टी पदाधिकारीको बैठक पनि स्थगित भएको छ। ‘भोलीको बैठक स्थगित गरिएको जानकारी आएको छ’, सभापति देउवाका सहयोगी भानु देउवाले भने, ‘कोराना संक्रमणका कारण केन्द्रीय समिति बैठक के हुन्छ भन्ने अहिल्यै केही भन्न सकिएन।’
कांग्रेसले १९ गतेलाई आफ्नो केन्द्रीय कार्यसमिति बैठक तय गरेको छ।
एकैपटक धेरै संख्यामा संक्रमण देखिएपछि र नेताहरु कन्ट्याक ट्रेसिङमा परेपछि स्वभाविक रुपले बैठकहरु अनिश्चित भएका छन्।
केन्द्रीय समिति बैठक तोकिएकै समयमा गरे पनि कसरी गर्ने या अर्को मिति कहिलेलाई तय गर्ने भन्नेबारे कांग्रेसका शीर्ष नेताहरुको भोलि आइतबार टेलिफोनमा छलफल हुने भएको छ।
शनिबारको बैठकमा सभापति शेरबहादुर देउवा, नेता रामचन्द्र पौडेल, उपसभापतिद्वय विमलेन्द्र निधि, विजयकुमार गच्छदार, महामन्त्रीद्वय शशांक कोइराला, पूर्णबहादुर खड्का, सहमहामन्त्री प्रकाशशरण महत, कोषाध्यक्ष सितादेवी यादव र प्रवक्ता विश्वप्रकाश शर्मा थिए।
त्यसैगरी नेताहरु कृष्णप्रसाद सिटौला, प्रकाशमान सिंह, गोपालमान श्रेष्ठ, रामशरण महत, अर्जुननरसिंह केसी, बलबहादुर केसी, मीनेन्द्रप्रसाद रिजाल, एनपी साउद, गगनकुमार थापा, चन्द्रकान्त भण्डारीको उपस्थिति रहेको थियो।
बैठकको अन्त्यतिर केन्द्रीय सदस्यहरुसहित कर्मचारी र सुरक्षाकर्मीमा कोरोना पोजेटिभ देखिएको खबर उपसभापति निधीले अरुलाई सुनाएका थिए। खबर पाएपछि शीर्ष नेताहरुसँग अरु नेताहरुले भोलीको छलफल स्थगन गर्नुपर्ने मत राखेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1792292945.webp)
-1786602170.png)
