काठमाडौं- नेकपा नेता वामदेव गौतमको मुद्दा 'हेर्दैहेर्दै'मा सरेको छ। गौतमको मुद्दामा बहस नसकिएपछि शुक्रबारलाई पेसी तोकिएको सर्वोच्चले जानकारी दिएको छ।
वामदेव गौतमलाई राष्ट्रियसभामा पठाउने निर्णयविरुद्ध अधिवक्ता दिनेश त्रिपाठीले मुद्दा दायर गरेका थिए। उक्त रिटमा सर्वोच्चको एकल इजलास अन्य संवैधानिक जिम्मेवारी नदिन भनेको थियो। यसका साथै उनको इजलासले गम्भीर संवैधानिक व्याख्या आवश्यक रहेको भन्दै संवैधानिक इजलासमा पठाउने उल्लेख गरेको थियो।
बुधबार निवेदकका तर्फवाट दिनेश त्रिपाठी, बद्रीबहादुर कार्की, हरि उप्रेतीलगायतले बहस गरेका थिए। सरकारका तर्फबाट महान्यायाधिवक्ता अग्नि खरेलले बहस गरेका थिए।
निवेदनको बहस सकिएपनि सरकारी पक्ष र गौतम पक्षका कानुन व्यवसायीको बहस बाँकी भएकाले मुद्दा हेर्दाहेर्दै राखिएको छ।
प्रधानन्यायाधीश चोलेन्द्र शमशेर राणासहित पाँच न्यायाधीशको इजलासमा गौतमको मुद्दा पेसी रहेको थियो। संवैधानिक इजलाशमा प्रधानन्यायाधीश राणा, दीपककुमार कार्की, हरिकृष्ण कार्की, विश्वम्भरप्रसाद श्रेष्ठ र ईश्वरप्रसाद खतिवडाको संवैधानिक इजलास गठन भएको थियो।
गौतमलाई सरकारको निर्णयमा राष्ट्रपतिले राष्ट्रिय सभा सदस्यका लागि सिफारिस गरेकी थिइन्। बर्दिया-१ बाट प्रतिनिधिसभा निर्वाचनमा पराजित भएका गौतम प्रधानमन्त्री हुन नसक्ने भएपछि मन्त्री हुन सक्ने सम्भावना कायम राख्दै राष्ट्रिय सभा जान तयार भएका थिए।
गौतमको सिफारिस संवैधानिक भए/नभएको र उनले अन्य संवैधानिक जिम्मेवारी लिन पाउने वा नपाउनेबारे शुक्रबार हुने सुनुवाईले निर्धारण गर्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1766648928.png)
