काठमाडौं- नेपालका लागि दक्षिण कोरियाका नवनियुक्त राजदूत पार्क पार्क योङ सुकले आफ्नो कार्यकालमा जलविद्युतलगायत पूर्वाधारको विकास, वैदेशिक लगानी विस्तार व्यापार घाटा घटाउने विषयमा कार्य गर्ने बताएका छन्।
नेपाल चेम्बर अफ कमर्सका अध्यक्ष राजेश काजी श्रेष्ठ र पदाधिकारीसँगको छलफलमा सुकले जलविद्युतलगायतका पूर्वाधारको विकास, वैदेशिक लगानी विस्तार, व्यापार घाटा घटाउने विषयमा र वैदेशिक रोजगारीका लागि सरल तथा सहज व्यवस्थाको लागि कार्य गर्न बताएका हुन्।
साथै सुकले कोभिड-१९ बाट कुनै मुलुक पनि अछुतो नरहेको भन्दै यसले विश्व अर्थतन्त्र नै प्रभावित भएको बताए।
सोही अवसरमा नेपाल चेम्बरका अध्यक्ष श्रेष्ठले नव नियुक्त राजदूत सुकलाई स्वागत तथा कार्यकालको शुभकामना दिँदै दक्षिण कोरियासँग कुटनीतिक सम्बन्ध स्थापना भएपछि व्यापार, लगानी, पर्यटन प्रवर्द्धनमा उल्लेख्य विकास भएको व्यक्त गरे। यसैक्रममा श्रेष्ठले नेपालबाट दक्षिण कोरियासँग व्यापार घाटा प्रत्येक वर्ष बढ्दै सन् २०१७/२०१८ मा निर्यात केवल १६ लाख अमेरिकी डलर बराबर भएको र आयात करिब पौने १० करोड भएको उल्लेख गरे।
दुवै देशबीच आर्थिक सम्बन्ध अभिवृद्धि गर्नका लागि नेपाल चेम्बर र कोरिया चेम्बरबीच समझदारीपत्रमा हस्ताक्षर भएको छ। त्यस्तै पर्यटन प्रवर्द्धन, व्यापारिक प्रतिनिधीमण्डलको आदान प्रदान, सीप विकास र प्रशिक्षण, कृषि क्षेत्रको विकास र कोभिड-१९ पछिको आपसी सहयोग आदी क्षेत्रहरूमा कोरियाबाट सहयोग र प्राविधिक सहायता आउने अपेक्षा अध्यक्ष श्रेष्ठले गरे।
सो अवसरमा चेम्बरका वरिष्ठ उपाध्यक्ष राजेन्द्र मल्ल तथा उपाध्यक्ष दीपककुमार मलहोत्रासमेतको उपस्थिति रहेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
