काठमाडौं- सर्वोच्च अदालतले वामदेव गौतमलाई सांसदका रूपमा थप जिम्मेवारी नदिन अन्तरिम आदेश जारी गरेको छ। न्यायाधीश आानन्दमोहन भट्टराइको इजलासले भर्खरै राष्ट्रियसभामा सांसद बनाइएका वामदेव गौतमलाई थप जिम्मेवारी नदिन अन्तरिम आदेश जारी गरेको हो।
आदेशमा 'संवैधानिक महत्वलाई दृष्टिगत गर्दै प्रस्तुत विवादलाई यथास्थितिमा राख्न आवश्यक देखिँदा थप संवैधानिक जिम्मेवारी दिने/लिने कार्य नगर्न/नगराउन' उल्लेख गरिएको छ।
वरिष्ठ अधिवक्ता दिनेश त्रिपाठीलगायतले वामदेव गौतमलाई थप संवैधानिक जिम्मेवारी नदिनका लागि अन्तरिम आदेश जारी गर्न माग गर्दै सर्वोच्चमा रिट निवेदन दायर गरेका थिए। यसमा अधिवक्ताहरु नानीबाबु दाहाल र हरिप्रसाद उप्रेती, अधिवक्ताहरु भद्रप्रसाद नेपाल (स्वागत), सरोजकृष्ण घिमिरे, ज्ञानेन्द्रराज आरण, कीर्तिनाथ शर्मा पौडेल, पंकजकुमार कर्ण, राजीव वास्तोला, अमिता गौतम पौडेल, सन्तोष भण्डारी, डा. शिवकुमार यादव, हरिप्रसाद दाहाल, जगतसिंह
साउत, विजयकुमार यादव र वीरभद्र जोशीले बहस गरेका थिए।
उनीहरूको बहस सुनिसकेपछि भट्टराईको इजलासले यस्तो आदेश जारी गरेको हो।
प्रतिनिधिसभा निर्वाचनमा बर्दिया १ बाट नेपाली कांग्रेसका सञ्जय गौतमसँग हारेका नेता गौतमलाई राष्ट्रपति विद्यादेवी भण्डारीले राष्ट्रिय सभामा मनोनयन गरेकी थिइन्। उनले राष्ट्रिय सभा सदस्यका रूपमा सपथ समेत लिइसकेका छन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।