काठमाडौं- शनिबार रातीबाट सुरु भएको इन्डियन प्रिमियर लिग (आइपिए)को दोस्रो दिन आइतबार दिल्ली क्याम्पिटल्स र किंग्स इलाभेन पञ्जाबबीच प्रतिस्पर्धा हुँदैछ। दुबई अन्तर्राष्ट्रिय क्रिकेट मैदानमा राती ७ बजेर ४५ मिनेटमा यी दुई टिम आमनेसामने हुँदैछन्।
पहिलो खेलमा जित हात पार्दै शुखद सुरुवात गर्ने लक्ष्यमा दुबै टिम छन्। श्रेयस ऐयरको कप्तानीमा मैदानमा उत्रिने दिल्लीको प्लेइङ सेटमा नेपालका युवा स्टार सन्दीप लामिछाने पर्छन् या पर्दैनन्। सबैको चासो छ।
सन्दीप आइपिएल टिम दिल्ली क्यापिटल्सबाट लगातार तेस्रो पटक आइपिएल खेल्न लागेका हुन्। क्यारेबियन प्रिमियर लिग (सिपिएल) सकाएर युएई पुगेका उनी क्वारेन्टाइनपछि टिमसँग अभ्यासमा सामेल भएका थिए।
दिल्लीसँग अहिले चार राम्रा स्पिनर छन्। जसमा विदेशी खेलाडीमा सन्दीप रहँदा भेट्रान खेलाडी अमित मिश्र, रविचन्द्रन अश्विन र अक्षर पटेल छन्। तर सन्दीपको प्रतिस्पर्धा अक्षर पटेल भन्दा पनि अमित र अश्विन हो। पछिल्लो समय अमित मिश्र लयमा छैनन्। २०१९ को नोभेम्बरमा सम्पन्न सियद मुस्ताक अली ट्रफिमा अमितले हरियानाबाट खेलेका थिए। जहाँ १२ खेलबाट ६ विकेट लिए। भारतीय क्रिकेट टिमका अश्विनको प्रदर्शन उच्च छ। उनको बलिङसँगै ब्याटिङ पनि राम्रो छ। २०१९ को आइपिएल संस्करणमा अश्विनले किंग्स इलाभेन पञ्जाबबाट १४ खेलमा १५ विकेट लिएका थिए।
युएईको पिच स्पिनरलाई फलदायी हुने अनुमान छ। युएईको पिच आइपिएल खेल्दै गरेका सबै भन्दा जानकार खेलाडी नै सन्दीप लामिछाने हो। त्यसैले पनि सन्दीपलाई प्लेइङ सेटमा राख्ने अनुमान सबैको छ। त्यसो त दिल्लीले सन्दीपसँगै अश्विनलाई खेलाउने प्रवल सम्भावना छ।
डेब्यु आइपिएलमा सन्दीपले ३ खेलबाट ५ विकेट लिए। त्यसपछि २०१९ मा भएको आइपिएलमा उनले ६ खेलबाट ८ विकेट लिए। प्लेइङ इलाभेनमा पर्न सन्दीपसँगै मार्कस स्टोइनिस, सिमरोन हिटम्यर, एनरिच नोर्टजे, कागिसो रबडा, ड्यानियल साम्स, किमो पाउल र एलेक्स क्यारी उच्च प्रतिस्पर्धामा छन्। यी आठ विदेशी खेलाडीमध्ये चार जनाले एउटा खेलमा खेल्न पाउने नियम छ।
सम्भावित प्लेइङ इलाभेन
दिल्ली
श्रेयस ऐयर (कप्तान), पृथ्वी शाव, शिखर धवन, सिमरन हिटम्यर, रिषभ पन्त, एलेक्स, क्यारी÷मार्कस स्टोइनिस÷किमो पाउल, अक्षर पटेल, रविचन्द्रन अश्विन, कागिसो रबडा, सन्दीप लामिछाने, इशान्त शर्मा
पञ्जाब
केएल राहुल (कप्तान), मयंक अग्रवाल, क्रिस गेल, ग्लेन म्याक्सवेल, सर्फराज खान, मन्दिप सिंह, कृष्णप्पा गोथाम, जेम्स निशाम÷क्रिस जोर्डन÷सेल्डन कट्रेल, रवि विश्नोइ, मोहम्मद सामी, मुजिब उर रहमान
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
