काठमाडौं–काठमाडौं-तराई/मधेश द्रुत मार्गमा निर्माण हुने सुरुङको काम अघि बढेको छ। द्रुत मार्गमा पर्ने सुरुङ निर्माणसम्बन्धी प्राविधिक सर्भे तथा अन्य काम अघि बढेको नेपाली सेनाले जनाएको छ। सुरुङको निर्माणका लागि जियोलोजिकल सर्भेको काम भई रिपोर्ट तयार भइरहेको छ।
राष्ट्रिय गौरवको आयोजना यस मार्गको यही भदौ ३० सम्मको प्रगति विवरण सार्वजनिक गर्दै नेपाली सेनाले यस्तो बताएको हो। पारदर्शी, गुणस्तरीय र समयसीमाभित्र आयोजना निर्माण सम्पन्न गरिसक्ने लक्ष्यसहित सेनाले निर्माणलाई तिब्रता दिएको जनाएको छ।
परामर्शदाता तथा स्थानीय साझेदारको संयुक्त टोलीले सर्भेको काम गरेका थिए। यद्यपि कोरोना भाइरसका कारण सृजित विषम परिस्थितिले भएको सबै टिम परिचालन गर्न नसकिएको नेपाली सेनाले उल्लेख गरेको छ।
जियोलोजिकल अनुसन्धानअन्तर्गत महादेवटार, धेद्रे र लेनडाँडामा बोर होल्स ड्रिलिङको काम भइरहेको र ड्रिलिङ भएका नमुनाहरुको परीक्षण कार्य सुरु भइसकेको छ। त्यस्तै नेपाली सेनाका अनुसार पहुँच मार्ग तथा बेलीबृज निर्माणसम्बन्धी कामसमेत अघि बढेको छ।
त्यस्तै सुरुङ मार्ग निर्माणका लागि सक्षम अन्तर्राष्ट्रिय निर्माण व्यवसायी छनोट गर्न प्रिक्वालिफिकेशन आह्वान गरिएकोमा भदौ ३० मा प्रि–बिड मिटिङ सकिएको र असोज १४ मा बिड सबमिसनको मिति तय भएको छ। वातावरणीय मूल्यांकनको प्रतिवेदन स्वीकृत भइसकेकाले सुरुङ मार्ग र पुल निर्माणको आवश्यक वातावरणीय प्रभाव मूल्यांकनको चरणमा रहेको सेनाले जनाएको छ।
४ किलोमिटर ढुंगामाटो कटिङ र फिलिङ कार्य गर्नका लागि प्रतिस्पर्धाबाट १२ वटा प्याकेजमा काम अघि बढेको छ। त्यस्तै द्रुत मार्गमा पर्ने स्थानमा काटिएको रुख बराबर अन्यत्र रुख रोप्नका लागि छलफल भइरहेको नेपाली सेनाको भनाइ छ। हालसम्म सेनाले १ लाख ७ हजार १ सय १८ वटा वृक्षारोपण गरिसकेको छ।
सेनाले कोरियन कम्पनी योसिन इञ्जिनियरिङ कर्पोरेसन जेभीलाई परियोजना सुपरीवेक्षणको जिम्मा दिएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
