काठमाडौं- आन्तरिक हवाई सञ्चालनको विषयमा सरकारको दुईवटा विरोधाभासपूर्ण निर्णय बाहिर आएको छ। चैत ११ गतेबाट बन्द रहेको आन्तरिक उडानको सुरु गर्ने विषयमा द्विविधा उत्पन्न भएको हो।
सोमबार बसको मन्त्रिपरिषद्ले असोज ५ गतेबाट आन्तरिक उडान सुरु गर्ने निर्णय गरेको सूचना बाहिर आएको थियो। तर, मन्त्रिपरिषदको निर्णय सार्वजनिक गरिने नियमित पत्रकार सम्मेलनमा भने सरकारका प्रवक्ता तथा परराष्ट्रमन्त्री प्रदीप ज्ञवालीले आन्तरिक उडान असोज १ गतेबाट नै सञ्चालन गर्न दिने निर्णय भएको बताए।
प्रवक्ताको भनाइ आएसँगै विभागी मन्त्रालय तथा सरोकारवाला निकाय अहिले चकित भएका छन्।
सोमबार बसको मन्त्रिपरिषद्को निर्णयकै आधारमा मन्त्रालयको हवाई उद्योग महाशाखाले मन्त्री तथा सचिवको सहमतिमा उडान सुरु गर्ने विषयमा सरोकारवाला निकायलाई ३१ गते बुधबार छलफलमा बोलाउने निर्णय गर्दै पत्र काटेको थियो। जुन पत्र नेपाल लाइभले प्राप्त गरेको छ।
मन्त्रालयको हवाई उद्योग महाशाखाले नेपाल नागरिक उड्डयन प्राधिकरण, नेपाल वायुसेवा निगम, हवाई सेवा सञ्चालक संघ र नेपाल एसोसिएसन अफ ट्राभल्स एण्ड टुर्स एजेन्टसलाई सम्बोधन गर्दै लेखिएको पत्रका भनिएको छ, ‘२०७७ असोज ५ गतेबाट आन्तरिक हवाई उडान सुरु गर्ने सरकारको निर्णयअनुसार आवश्यक तयारीको विषयमा सचिवको संयोजकत्वमा छलफल हुने भएको हुँदा एक/एक जना प्रतिनिधी सहभागी भइदिनुहुनु अनुरोध छ।’
तर, मंगलबार साँझ सोमबारको मन्त्रिपरिषद्को निर्णय सुनाउँदै गर्दा प्रवक्ता ज्ञवालीले असोज १ गतेबाट नै आन्तरिक उडान सुरु गर्ने र ५० प्रतिशत बढी भाडा लिने पाउनेगरी ५० प्रतिशतमात्रै यात्रु बोक्ने पाउने निर्णय भएको भन्दै निर्णय सुनाएसँगै सरोकार वाला निकाय र विभागी मन्त्रालय चकित भएका हुन्।
‘मन्त्रिपरिषद्मा मन्त्रालयबाट गएको प्रस्ताव पनि ५ गतेबाट नै भन्ने थियो। कसरी १ गतेबाट सुरु गर्ने निर्णय भयो,अहिले हामी नै चकित छौं। मन्त्रिपरिषद्मा उपस्थित भएर निर्णय गरेका मन्त्री समेत यो विषयमा अनभिज्ञ भएका छन्,’ मन्त्रालय उच्च स्रोतले भन्यो, ‘एक दिनमै भाडा तय तथा कसरी उडान गर्ने भन्ने विषयमा सबै काम गर्न सहज छैन। यो त हावादारी निर्णय नै हो।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
