काठमाडौं- कोभिड १९ महामारीपछि नेपालका उद्योग व्यवसायहरूमा परेको प्रभाव र त्यसबाट उद्योग व्यवसायहरुले भोग्नु परेको समस्याहरुको सम्बन्धमा जानकारी गराउन नेपाल उद्योग परिसंघका पदाधिकारीहरुले शनिबार राष्ट्रपति विद्यादेवी भण्डारीलाई भेटेका छन्।
परिसंघका पधाधिकारीहरुले राष्ट्रपति समक्ष कोभिडको महामारीबाट जोगिनको लागि लकडाउन वा निषेधाज्ञाजस्ता व्यवस्थाहरु अवलम्बन गरी संक्रमण रोकथामको प्रयास गर्नुभन्दा कर्मचारीहरु र कामदारको मनोबल उच्च बनाई सुरक्षा उपायहरु अवलम्बन गरी कोभिडको साथमा नै उद्योग व्यवसाय तथा बजारहरु सञ्चालन गर्नुपर्ने माग राष्ट्रपति समक्ष राखेको थियो।
त्यस्तै उद्योग प्रतिष्ठानहरुले राजश्व दाखिला गर्ने सम्बन्धमा सरकारलाई सधैं सहयोग गर्दै आइरहेको र यसअघि पनि उल्लेख्य राजस्व दाखिला भएको जानकारी गराउँदै वर्तमान अवस्थामा सिर्जना भएको असहज परिस्थितिलाई मध्यनजर गरी तोकिएको समयावधिभन्दा एक महिना बढीको समय थप
गर्ने व्यवस्थाको लागि समेत परिसंघले अनुरोध गरेको थियो।
यसबाट निषेधाज्ञा जारी भएको अवस्थामा राजस्व दाखिला गर्नबाट वञ्चित उद्योगी व्यवसायीहरुलाई सहज हुने धारणा परिसंघको रहेको थियो।
राष्ट्रपतिसँगको भेटमा उद्योग व्यवसायहरू पूर्ण सञ्चालनको माग गर्दै परिसंघका पधाधिकारीहरुले उद्योगमा कार्यरत कर्मचारी र मजदुरहरुलाई सरकारले तोकेका सुरक्षाका मापदण्डहरु पूर्णरुपमा पालना गर्न लगाउने र कोभिङको संक्रमणबाट जोगाउनका लागि आफूहरु प्रतिबद्ध रहेको बताएका थिए।
परिसंघले यस्तो विषम परिस्थितिमा उद्योगमा कार्यरत कर्मचारी र कामदारहरुको हौसला बढाई काममा लगाउनुपर्ने धारणा राख्दै यदि उद्योगहरुमा कार्यरत कर्मचारी वा कामदारमा सक्रमण भेटिएमा कन्ट्याक्ट ट्रेसिडको आधारमा कर्मचारी तथा कामदारको पिसिआर गराएर बाँकी कर्मचारी तथा कामदारबाट उद्योग सञ्चालन गर्ने व्यवस्थाको लागि पनि राष्ट्रपति समक्ष अनुरोध गरेको छ।
कोभिडको महामारीबाट पर्यटन क्षेत्र पनि नराम्ररी प्रभावित भएको परिसंघका पदाधिकारीहरुले राष्ट्रपतिसमक्ष जानकारी गराएका थिए। पर्यटन क्षेत्रलाई व्यवस्थित गर्दै होटल तथा पर्यटक गन्तव्यहरुलाई पूर्णरुपमा सञ्चालन गर्नको लागि पनि राष्ट्रपति समक्ष अनुरोध गरेको थियो। कुनै पनि देशबाट पर्यटक नेपाल प्रवेश गर्दा हाल भएको चौध दिनसम्मको क्वारेन्टाइनको व्यवस्थालाई परिमार्जन गरी तीन दिनको क्वारेन्टाइनको व्यवस्था गर्नुपर्ने र तीनदिनको क्वारेन्टाइनपछि सम्बन्धित पर्यटकको पिसिआर टेस्ट गरी परिक्षण नेगेटिभ आएमा निर्वाधरुपमा घुमफिर गर्ने व्यवस्था मिलाउनुपर्ने सम्बन्धमा छलफल भएको
थियो।
राष्ट्रिय अर्थतन्त्रको मेरुदण्डको रुपमा रहेको निजीक्षेत्र कोभिड- १९ महामारीपछि एकदमै गम्भीर परिस्थितिबाट गुज्रिरहेको राष्ट्रपतिलाई जानकारी गराउँदै आर्थिक समृद्धि र अर्थतन्त्र चलायमान बनाउनको लागि लकडाउन वा निषेधाज्ञा लगाउने कार्य बन्द गर्नुपर्ने धारणा परिसंघको रहेको थियो।
त्यस्तै संक्रमणलाई रोक्नका लागि सुविधासम्पन्न उपचार केन्द्रहरुको स्थापना, राम्रो क्वारेन्टाइन र आइसोलेशनको व्यवस्था गर्नुपर्ने धारणा परिसंघको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
