काठमाडौं- नेपाल कम्युनिस्ट पार्टी (नेकपा) का नेता माधव कुमार नेपालले कसैका विरुद्ध निम्नस्तरका गाली गलौज नगर्नेलाई मात्रै राजनीतिक नियुक्ति गर्नुपर्ने बताएका छन्।
‘एउटा तहमा छलफल चलाई समाजमा बद्नाम नभएका एवं कसैका विरुद्ध निम्न स्तरको गाली गलौज तथा सार्वजनिक अपमान नगरेको र नगर्ने व्यक्तिलाई मात्र नियुक्त गर्नुपर्छ’, उनको भनाइ छ।
शुक्रबार बसेको नेकपा स्थायी कमिटीको बैठकमा उनले बुँदागत रुपमा आफ्नो धारणा राखेका थिए। जसमा राजनीतिक नियुक्तिका विषयमा बोलेका थिए। नियुक्त हुने व्यक्तिको आचरण, व्यवहार, आस्था र सन्तुलन समेत विचार गर्नुपर्ने उनको भनाइ छ। पछिल्लो समय पार्टीभित्रकै फरक समूहका नेतालाई पत्रपत्रिका तथा सामाजिक सञ्जालमार्फत गाली गलौज गर्नेहरुले नियुक्ति पाइरहेको भन्दै आलोचना हुने गरेको छ।
नेता नेपालले पार्टी सम्बन्धमा र सरकार सम्बन्धमा फरकफरक बुँदाहरु बनाइ आफ्नो धारणा राखेका थिए।
उनले राज्यशक्तिको दुरुपयोग पार्टीको आन्तरिक प्रतिस्पर्धालाई प्रभावित गर्न नहुने बताएका थिए।
‘चाकरी र मूल नेतृत्वसँग सामिप्यताको आधारमा होइन काम र क्षमताको आधारमा प्रत्येकलाई आफ्नो भविष्य सुनिश्चित देख्ने वातावरण निर्माण गर्नुपर्छ, अनि मात्र पार्टीमा आकर्षण बढ्छ’, उनको भनाइ थियो, ‘पाटीभित्र झ्याङ्गिएको गैर सर्वहारा एवं गैर कम्युनिष्ट प्रवृत्ति र चरित्रका विरुद्ध व्यापक शुद्धीकरण अभियान र बैचारिक सैद्धान्तिक प्रशिक्षण अभियान चलाउनु अत्यावश्यक छ।‘
उनले पार्टीले सरकार सञ्चालन गर्नुपर्ने स्पष्ट पारेका छन्।
‘सरकारले गर्ने महत्वपूर्ण निर्णय तथा दीर्घकालीन महत्व राख्ने विषयहरुलाई पार्टीमा छलफल गराउनु पर्दछ र आवश्यकता अनुसार विज्ञको राय लिनुपर्दछ ‘, नेता नेपालको भनाइ छ।
समाजवादको सिद्धान्त र नेपाली व्यवहारबारे नेतृत्व पंक्तिको एउटै राय बनाउन घनिभूत र व्यापक छलफल र बहस चलाउनु पर्ने उनको भनाइ छ। भ्रष्ट्राचारका प्रत्येक मुद्दामा सरकार एवं पार्टी दुवै संवेदनशील हुनुपर्छ उनको भनाइ छ। ‘नेता तथा कार्यकर्ताहरुको जीवनशैली सादगीपूर्ण र पारदर्शी हुनुपर्छ’, उनले बैठकमा प्रस्तुत गरेको धारणामा उल्लेख छ, ‘प्रत्येक उजुरीको पार्टी तथा राज्यका सम्बन्धित अङ्गबाट तत्काल निष्पक्ष छानबिन गर्नुपर्छ, दोषीमाथि कडा कारवाही गर्नुपर्छ, गम्भीर जनसरोकार र सुशासनका कुरामा कसैलाई छुट दिनुहँदैन।‘
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
-1788425345.png)
