फाइल तस्बिर
काठमाडौं- कोभिड–१९ का कारण सबैभन्दा बढी प्रभावित क्षेत्र पर्यटन तथा हवाई उड्डयन क्षेत्र हो। चैत ११ गतेदेखि बन्द यो क्षेत्र अहिलेसम्म पनि बन्द नै छ। ‘नेपालकको पर्यटन क्षेत्र बचाउनु आजको आवश्यकता हो,’ संस्कृति, पर्यटन तथा नागरिक उड्डयन मन्त्री योगेश कुमार भट्टराईले भने, ‘तत्काल पर्यटन क्षेत्र सुचारु गर्नका लागि सरकार तयारी अवस्थामा रहेको छ।’
बिहीबार नेपाल आर्थिक पत्रकार समाज (सेजन)ले आयोजना गरेको छलफलमा बोल्दै मन्त्री भट्टराईले अब तत्काल नेपालको पर्यटन क्षेत्र जोगाउने भनेको नै आन्तरिक पर्यटनको प्रवर्द्धन गरेको बताएका छन्। आन्तरिक पर्यटनको प्रवर्द्धन गरेर तत्काल पर्यटन क्षेत्रलाई चलायमान बनाउन सकिने उनको भनाइ छ। हालको अवस्थामा पर्यटन क्षेत्र जोगाउनका लागि आन्तरिक पर्यटन नै प्रमुख विकल्प रहेको मन्त्री भट्टराईले बताएका छन्।
असोज १५ गतेबाट आन्तरिक उडान
साथै मन्त्री भट्टराईले यात्रु सेवा र आन्तरिक पर्यटन प्रवर्द्धनलाई मध्यनजर गर्दै आउँदो असोज १५ गतेदेखि आन्तरिक उडान सुचारु गर्ने योजना रहेको जानकारी दिएका छन्।
‘मेरो जोड असोज एक गतेदेखि नै आन्तरिकतर्फ नियमित उडान सुचारु गर्ने हो। तर छलफल गर्दा असोज १५ गतेदेखि नियमित आन्तरिक उडान सुचारु गर्न सक्छौं कि भन्ने सोचमा छौं।’ मन्त्री भट्टराईले भने। मन्त्रालयले सुरुमा हिमाली र पहाडी क्षेत्रमा २० प्रतिशतका दरले उडान संख्या खुला गर्ने योजना रहेको उनले जानकारी दिए।
यसअघि आन्तरिकतर्फ दैनिक तीन सयभन्दा बढी नियमित उडान हुँदै आएको थियो। स्वास्थ्य सुरक्षा अवलम्बनसँगै यात्रुको ट्राभल डकुमेन्ट राखी उडान सुचारु गर्ने योजना रहेको उनले बताए।
तत्काल आन्तरिकतर्फ नियमित उडान सुचारु नभए उड्डयन क्षेत्रमा मेसिनरी लसले थप व्यय थपिने वायुसेवा संचालक संघका महासचिव योगराज कंडेलले बताए। ‘पर्यटन उद्योग ब्राण्डिङ बिजनेश हो, तत्काल आन्तरिक उड्डयन क्षेत्र सुचारु गर्दा फाइदा हुनुभन्दा पनि हवाई यातायात सुचारु भयो भन्ने सूचना प्रवाह त हुन्छ। योसँगै मेसिन चलायमान हुँदा व्यय कम हुने देखिन्छ‘उनले भने।
सबै कम्पनीले अन्तर्राष्ट्रिय नागरिक उड्डयन संगठनले जारी गरेअनुसारको स्वास्थ्य सुरक्षा निर्देशिका पालनाको तयारी गरेका कारण आन्तरिक उडान सुचारु गर्दा कोभिड संक्रमण फैलने कुनै पनि सम्भावना नरहने उनले बताए।
‘हामीले तयार गरेको स्वास्थ्य सुरक्षा निर्देशिकाअनुसार प्रत्येक यात्रुलाई चार चरणको चेक जाँच गरिन्छ। यसो हुँदा हरेक उडानमा कोभिड नेगेटिभ यात्रुको मात्र सहभागिता हुन्छ। यसरी उडान सुचारु गर्दा हामीलाई नाफा हुँदैन तर बजारमा सुरक्षित यात्रा गर्न सकिने प्रचार त हुन्छ नी,’ उनले भने।
पर्यटनसँग सम्बद्ध सबै क्षेत्र स्वास्थ्य सुरक्षा अवलम्बन गर्दै व्यवसाय गर्न तयार रहेका कारण सरकारले तत्काल पर्यटकीय गतिविधी सुचारु गराउन आवश्यक रहेको ट्रेकिङ एजेन्सी एशोसिएसन नेपालका अध्यक्ष खुम सुवेदीले बताए।
नियमित उडान संख्या र यात्रु संख्या बढाउने तयारीमा सरकार
वैदेशिक रोजगारबाट नेपाल फर्कने यात्रुको माग बढेसँगै सरकारले अन्तर्राष्ट्रिय निमयित उडान र यात्रु संख्या बढाउने तयार गरेको जनाएको छ। दैनिक तीन हजार यात्रुलाई स्वदेश फर्काउने उद्देश्यले बिहीबार संस्कृति, पर्यटन तथा नागरिक उड्डयन मन्त्रालय, गृह मन्त्रालय, परराष्ट्र मन्त्रालय र श्रम मन्त्रालयबीच समझदारी भएको पर्यटन मन्त्री योगेश भट्टराईले बताएका छन्।
अनिवार्य पिसिआर परीक्षण नेगेटिभ, आफ्नै खर्चमा यात्रु ल्याइदिन चाहने वायुसेवा कम्पनीलगायतलाई मधयनजर गर्दै नियमित उडान संख्या र यात्रु संख्या बढाउने योजना रहेको मन्त्री भट्टराईले जानकारी दिए।
‘वैदेशिक रोजगारमा गएका लाखौं नेपालीहरु अलपत्र पर्नुभएको छ। उहाँहरु छिट्टै नेपाल आउन चाहनुभएको छ। कतिपय वायुसेवा कम्पनीले आफ्नै खर्चमा ती नेपालीहरुलाई स्वदेश फर्काउन चासो देखाउनुभएको छ। यही कुरालाई मध्यनजर गर्दै उडान संख्या र यात्रु संख्या बढाउने योजनाभएको हो’ उनले भने।
मन्त्रालयका अनुसार बिहीबार मन्त्रालयले प्रस्तावपत्र कोभिड–१९ क्राइसिस मेनेजमेन्टका लागि गठित समितिमा पठाइसकेको छ। पिसिआर परीक्षण नेगेटिभ आएको विदेशी पर्यटकलाई नेपाल भ्रमणका लागि अनुमति दिनका लागि प्रस्तावमा उल्लेख गरिएको मन्त्रालयले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
